Se non hai acordo, o mércores retomarase a folga indefinida de transporte na Coruña
Todo iso despois de que o pasado mércores o persoal do transporte de viaxeiros por estrada na provincia da Coruña acordase mostrar o seu rexeitamento, de maneira maioritaria, ao preacordo subscrito coa patronal
A folga de transportes de viaxeiros por estrada da provincia da Coruña retomarase o vindeiro mércores, con carácter indefinido, no caso de non alcanzar un acordo na reunión prevista este luns entre os sindicatos e a patronal.
Así o confirmou o portavoz da CIG, Inácio Pavón, quen indicou que nas asembleas celebradas este venres na Coruña, Ferrol e Santiago participaron máis de 400 traballadores.
Todo iso despois de que o pasado mércores o persoal do transporte de viaxeiros por estrada na provincia da Coruña acordase mostrar o seu rexeitamento, de maneira maioritaria, ao preacordo subscrito coa patronal.
Unha reacción que chegou tras a firma do preacordo por parte dos sindicatos UXT e CCOO. Pola súa banda, a CIG, non o subscribiu ao entender que os avances eran "mínimos" en materia salarial e laboral.
Con todo, CIG, UXT e CC.OO reuniranse este luns ás 13.00 horas coa patronal para tratar de chegar a un acordo e evitar así unha folga indefinida no sector.
Escribe o teu comentario