O FEVE e tren Vigo-Tui volve funcionar pero non os rexionais e media distancia desde Vigo a Ourense e Santiago

O paso da borrasca que desde o fin de semana afecto a Galicia continúa causando incidencias na rede ferroviaria. Adif informou este martes da recuperación completa da circulación entre Vigo Guixar, Redondela e Tui, así como na liña de ancho métrico entre Ferrol e Ribadeo, que permanecía interrompida desde o luns polas fortes choivas e o vento.

Con todo, o panorama segue sendo complicado no interior da comunidade. Segundo fontes do administrador ferroviario, os trens entre Ourense e Vigo Guixar seguen suspendidos, do mesmo xeito que o servizo convencional entre Ourense e Santiago, onde unicamente circulan os trens de alta velocidade, e fano coa velocidade limitada a 160 quilómetros por hora por motivos de seguridade.

O temporal provocou distintos incidentes ao longo do día. Entre as 8:23 e as 9:30 da mañá, un convoi de media distancia chocou cunha árbore caída sobre a vía entre Curtis e Oza dos Ríos (A Coruña). Este suceso obrigou a suprimir parcialmente dous trens e ocasionou un atraso duns dez minutos nun tren de mercadorías, segundo Adif.

Pola noite do luns ao martes rexistrouse outro contratempo maior na provincia de Lugo. Un tren Alvia que cubría a ruta entre Barcelona e A Coruña impactou cun desprendemento de terras á altura de Quiroga, no punto quilométrico 337/400, quedando bloqueada a liña entre San Clodio e Freixeiro. A circulación permaneceu interrompida até as 5:38 horas e o tren afectado acumulou un atraso de tres horas.

Continuación progresiva dalgunhas liñas

O administrador de infraestruturas ferroviarias informou á primeira hora da tarde deste martes que ás 16:25 horas restableceuse o tráfico entre Ourense e Guillarei, o que permite retomar a conexión co sur da provincia de Pontevedra. Renfe, pola súa banda, explicou que mantén un seguimento continuo da situación e que os servizos alternativos por estrada seguirán operativos mentres persistan as restricións.

Durante os últimos días, Galicia encadeou varios episodios de choiva intensa e refachos de vento superiores aos 100 quilómetros por hora. A Axencia Estatal de Meteorología (Aemet) mantén activos avisos amarelos e laranxas por mal tempo en boa parte da comunidade, especialmente nas Rías Altas e o interior lucense. O fin de semana temporal "Irene" foi un dos máis adversos do inverno en Galicia no que vai de ano, afectando tanto ao tráfico ferroviario como a estradas e subministración eléctrica. O luns e o martes tocoulle a quenda á borrasca Joseph. 

Adif sinalou que os labores de retirada de árbores, limpeza de noiros e revisión de tendidos eléctricos continuarán durante os próximos días para comprobar o estado da rede. Desde a Xunta de Galicia non se informou, de momento, sobre danos adicionais nin sobre incidencias graves na rede viaria autonómica.