Ferido grave un operario na Pobra que foi rescatado tras quedar atrapado debaixo dun camión

Os bombeiros rescataron este martes a un operario no municipio coruñés da Pobra do Caramiñal ao que se lle quedou atrapada unha perna debaixo dun camión.

Segundo informa o 112, os efectivos do parque comarcal de Boiro utilizaron tacos e un hidráulico para liberar ao operario. Unha vez accesible, o ferido foi atendido polo equipo médico, que preparou o seu traslado ao Hospital Clínico de Santiago a bordo do helicóptero medicalizado.

Faltaban uns minutos para as 16.00 horas cando o 112 recibiu o aviso dun traballador cunha perna atrapada debaixo dun camión de obra. Atopábase na beiravía da AC-302, na recta de Lesón, á altura duns talleres.

Os medios mobilizados foron Urxencias Sanitarias de Galicia-061, os Bombeiros de Boiro e Ribeira e os axentes da Policía Local.