GTA As Neves: conduce un coche roubado, sen carné, de maneira temeraria, ten un accidente e foxe do lugar
O investigado, de 25 anos de idade, deixou un ferido no sinistro no que se viron implicados varios coches en Ponteareas.
A Garda Civil investiga a un veciño das Neves (Pontevedra), de 25 anos de idade, como presunto autor de varios delitos, por conducir sen carné un coche roubado, de forma temeraria, e co que provocou un accidente, fuxindo a continuación do lugar.
Segundo informou a Comandancia de Pontevedra, os feitos ocorreron o pasado 18 de maio, cando se produciu un accidente de tráfico no municipio de Ponteareas, no que varios coches estiveron implicados, e no que unha persoa resultou ferida e tivo que ser trasladada a un hospital.
O condutor causante do sinistro fuxiu do lugar e o coche no que ía apareceu calcinado posteriormente. A dona do vehículo denunciara a súa subtracción.
O Grupo de Investiación de Accidentes de Tráfico (GIAT) do Subsector de Pontevedra iniciou unha investigación coa colaboración de axentes do destacamento de Tráfico do Porriño e do Posto de Salvaterra.
Tras medio ano de pescudas e xestións, logrou identificar ao condutor, que agora está investigado polos delitos de furto de uso de vehículo, abandono do lugar do accidente, condución temeraria, condución sen carné, lesións imprudentes e danos.
O ateigado elaborado polo GIAT e as pescudas realizadas foron postas a disposición do xulgado de instrución de Ponteareas.
Escribe o teu comentario