Cortada a A-52 en Trasmirás ao incendiar un camión

O incendio nun camión que transportaba motores obrigou a cortar un tramo da A-52 ao seu paso polo municipio ourensán de Trasmirás (parroquia de Vila de Rei), entre os quilómetros 173 e 181. Con todo, o lume foi extinguido, sen que se rexistrasen persoas feridas.

O 112 Galicia, quen informa do sucedido, recibiu o aviso ás 04.50 horas, a través da chamada dun particular que alertou da presenza do vehículo en chamas. A continuación, o Centro Integrado de Atención ás Emerxencias (CIAE) deu o aviso aos Bombeiros de Xinzo e de Verín e á Garda Civil.

Aínda que o incendio do camión está xa apagado e parte dos equipos de emerxencia deron por finalizada a súa intervención, a A-52 continúa cortada ao tráfico no tramo afectado.