Morre un madrileño atropelado ao tentar cruzar en vermello un semáforo en Vilagarcía
O 112 puxo os feitos en coñecemento de Urxencias Sanitarias-061, que derivou ao lugar a un helicóptero medicalizado con base en Santiago
Un home de 75 anos, veciño de Madrid, morreu na mañá deste domingo ao ser atropelado por un coche en Vilagarcía de Arousa cando tentaba cruzar un paso de peóns co semáforo en vermello.
Segundo informe o 112 Galicia, sobre as 11.40 horas chamaba unha persoa para alertar deste atropelo na PO-548, á altura do número 78, na recta de Carril. Indicaba que a persoa estaba ferida de consideración, pero totalmente accesible.
Seguidamente, o 112 puxo os feitos en coñecemento de Urxencias Sanitarias-061, que derivou ao lugar a un helicóptero medicalizado con base en Santiago.
Un médico que pasaba polo lugar en moto tentou reanimalo sen éxito. Ao intre, os profesionais do 061 desprazados até alí tampouco puideron facer nada por salvarlle a vida e só certificaron o seu falecemento.
Tamén acudiron ao momento os bombeiros de Vilagarcía, a Policía Local e o Servizo Municipal de Emerxencias.
De acordo con información do Concello, en base ás pescudas da Policía Local, o home trataría de cruzar a rúa en vermello: "Mirou ao carón pero non ao outro, coa mala fortuna de que un vehículo o atropelou".
Unha muller que saíu dunha das casas que están na leira de Artime, fronte ao parque de Compostela, recoñeceu ao accidentado como o seu esposo.
Escribe o teu comentario