Dimite o concelleiro de Parques de Santiago, José Manuel Pichel, tras alugar a sede a unha empresa, Desproi, que el dirixiu

José Manuel Pichel acaba de dimitir como concelleiro de Parques e Xardíns de Santiago. 

Faio tras as denuncias da oposición de que o Concello mantén alugada unha nave industrial para o departamento de Parques e Xardíns a unha empresa da que foi directivo, accionista e mantén participacións a través dunha compañía interposta. 

De "erro considerable" cualificó hoxe a súa conduta o político socialista. Pichel recoñeceu que fora un fallo o "non comunicar ao alcalde nin ao resto da Xunta de Goberno" a súa condición accionista da empresa Desproi Promocións SL.

EXPLICACIÓNS DO DIMISIONARIO

No rexistro mercantil, Pichel aparece como administrador desta sociedade até 2016. Compostela Aberta denució o luns que seguiu de accionista da compañía até días antes de que o Concello aprobase o aluguer dunha nave para as oficinas da Concellería que dirixía Pichel.

O político recoñeceu que non informou da súa relación con Desproi pero alega que o fixo "sen mala fe" e sen "ningunha intención de ocultar". En todo caso, admite que se cuestione "a honorabilidade" deste Goberno local de Sánchez Bugallo, polo que presenta a súa dimisión.

POSTURA DO PSDEG

Tras a denuncia inicial, o alcalde quitoulle credibilidade. "Queres facer o favor de deixar de ler o que di Compostela Aberta?”, díxolle a un xornalista cando lle preguntou onte polo asunto. "Non teño coñecemento do tema e é unha solución provisional" dixo o alcalde en relación ao aluguer.

O PSOE reaccionou onte á denuncia cun comunicado no que defendía a limpeza da adxudicación. Iso si, admitía que Pichel non informou da súa relación con Servizos  Técnicos Gaia, que seguiría sendo accionista de Desproi. Fnalmente, Pichel decidiu dimitir o mércores. A oposición pedira o seu cesamento.

Na súa declaración de bens ao tomar posesión, Pichel recoñeceu o seu vínculo con outra sociedade, Servizos Técnicos Gaia. Segundo as acusacións que provocaron a súa caída, o político vendería as súas accións de Desproi pouco antes da adxudicación pero as mantería a través de Gaia, compañía interposta. Pichel foi administrador de Gaia até inicios de 2018. En Desproi tamén aparecen como directivos persoas vinculadas ao PSOE e aos sindicatos Unións Agrarias e UXT.

O contrato de aluguer de oficinas para a Concellaría efectuouse mediante o procedemento de contrato menor. Isto permite ás administracións adxudicar sen ter que facer concurso público cantidades limitadas, o que popularmente se coñece como contrato a dedo. Pichel nin informou o Concello nin se ausentou da a Xunta de Goberno que aprobou o gasto.

REACCIÓNS DA OPOSICIÓN

"O goberno socialista ten que dar explicacións sobre esta desviación de diñeiro a unha empresa vinculada ao PSOE ou marchar para casa" dixo hoxe Borja Verea (#PP), líder da oposición.

Compostela Aberta, que destapou o asunto nun comunicado o luns, considera incoherentes as explicacións ofrecidas polo executivo local. Os rupturistas indican que o funcionario que deu o visto e prace ten relación co PSOE e que o contrato aprobado era para catro meses, pero se asinou finalmente por un ano e leva activo 16 meses.

Pola súa banda, o Bloque apunta ao propio alcalde. En opinión de Gorett Sanmartin Rei "ou alcalde non pode ocultar a súa responsabilidade e complicidade nun asunto de corrupción que lembra tempos pasados ​​en Raxoi". "Con diñeiro público non se pode favorecer a unha empresa a través dun contrato ou prorrogalo por cantidades tan elevadas e o alcalde é o responsable desta situación", advirten os nacionalistas.