O mal menor para o Celta de Vigo, que se medirá ao Olympique de Lyon de Endrick e Tolisso

Un puñado de goles marcaron a diferenza entre o Olympique de Lyon e o Aston Villa na liguiña da Europa League. Os dous equipos gañaron sete dos seus oito partidos (o Lyon perdeu contra o Betis; a Vila contra o modesto Go Ahead Eagles) e con 21 puntos a táboa decidiuse polo acerto realizador dos franceses, que agora se medirán a un Celta de Vigo lanzado pero que terá que superar en oitavos de final a un dos favoritos por facer co título, pois o Olympique de Lyon será o seguinte rival do cadro celtiña.

O MENOR DOS MALES

Moitos preferían aos galos antes que ao Aston Villa de Unai Emery, que nestes momentos encabeza as apostas por lograr o cetro continental. A vitoria de onte ante o PAOK reafirma que o Celta non está en Europa de turismo e postúlase como un dos ósos do torneo, pero o sorteo cruzábao con dous rivais temibles e o Lyon era, para moitos, o menor dos males. 

En fronte terán a un histórico da liga francesa que, con todo, vén de vivir horas moi baixas. Este verán mesmo se especulou co seu descenso por cuestións administrativas, despois de eludilo con algúns apuros en tempadas anteriores, onde tivo que protagonizar grandes remontadas que ao final lle valeron para alcanzar postos europeos nalgunha ocasión. 

Este ano, con todo, a súa marcha tanto no campionato ligueiro, onde vai terceiro e ben establecido en postos de Champions, como en Europa, o cadro dirixido por Paulo Fonseca resulta un firme candidato ao título, con fichaxes como o do madridista Endrick para esta segunda parte da tempada. 

Xunto a el, Tolisso, ex do Bayern, Fofana, unha das grandes promesas do campionato do país veciño, ou Greif, coñecido tras o seu paso polo Mallorca, son algunhas das grandes ameazas deste Lyon que terá que igualar en empeño a un Celta de Vigo que este ano gañou ao PAOK en tres ocasións e que presume dun pleno de vitorias ante os seus rivais franceses: Lille e Niza, ambos en Balaídos. 

O gañador dese duelo verallas co que saia vitorioso do cruzamento entre Friburgo e Genk, rival de feliz recordo para os olívicos pois en 2017, na súa última aventura polo Vello Continente, gañaron ao cadro belga para meter nunha semifinal histórica contra o Manchester United, lembrada por sempre por aquela última ocasión nos pés de John Guidetti. Antes espera o Olympique, que visitará Vigo o 12 de marzo para posteriormente pechar a eliminatoria no Stade deas Lumières o día 19.

OUTRA SORTE PARA Os ESPAÑOIS

O resto de equipos da liga en Europa tiveron sorte desigual este venres. Na Champions o Real Madrid, que podía regresar a Lisbo para medir ao Sporting de Portugal, terallas (unha vez máis, e xa van...) co Manchester City de Guardiola. Será o duelo máis picante duns oitavos que mandan a todos os españois a Inglaterra: o Barça, que evita ao PSG, viaxará a Newcastle; o Atleti, que sortea ao Liverpool, ten unha cita en Londres co Tottenham. 

Os gañadores deses dous partidos cruzaranse en cuartos de final, que podería deixar un derbi español entre Atleti e Barça, o que sumaría outro encontro mutuo xa que a semana que vén ten a volta das semifinais copeiras, onde os colchoneiros chegan cunha gran vantaxe tras o 4-0 da ida. Pola súa banda, e de pasar, o Real Madrid xogaría con Atalanta ou Bayern. 

Mellor sorte tivo o Real Betis, que terá que viaxar a Atenas para enfrontar ao Panathinaikos dun vello coñecido da afección celeste, pois Rafa Benítez dirixe ao conxunto heleno. O que pase terá un duelo previsiblemente máis cómodo, con Ferenváros ou Sporting de Braga como futuros rivais.