“Homologación Xusta Xa” denuncia 24 días de inactividade en en Ministerio de Universidades
España necesita profesionais titulados como médicos e enfermeiras pero moitos estranxeiros non poden exercer porque a Administración do Estado é lentísima tramitando as súas homologacións. O problema, que se arrastra desde hai anos, agravouse recentemente por, segundo denuncian os solicitantes, a cerrazón da sede electrónica do proceso creado para tramitar o papelorio.
O movemento Homologación Xusta Xa denuncia publicamente que, desde fai 24 días, a sede electrónica destinada a consultar os expedientes e o estado dos procesos de homologación e equivalencia de títulos universitarios en España permanece inactiva, impedindo a miles de profesionais coñecer a situación administrativa das súas solicitudes.
Tras o incidente técnico recoñecido polo Ministerio de Universidades, este decidiu un peche parcial da sede electrónica, que afectou a diversos procedementos e foi comunicado a través da súa páxina web. Posteriormente, o pasado 13 de febreiro, anunciouse unha apertura parcial do servizo, da cal quedaron excluídos os procesos de homologación e equivalencia.
Esta prolongada interrupción xerou unha profunda preocupación entre as persoas afectadas, que alertan das consecuencias profesionais e persoais derivadas da imposibilidade de acceder aos seus expedientes. Segundo explican, a falta de acceso bloquea oportunidades laborais, paraliza procesos académicos e dificulta a integración profesional de miles de titulados estranxeiros.
Os solicitantes consideran discriminatorio que este único procedemento continúe paralizado mentres outros servizos administrativos han recuperado parcialmente o seu funcionamento, colocando así a este colectivo nunha clara situación de desvantaxe.
Así mesmo, denuncian a falta de comunicación oficial sobre os prazos estimados de restablecemento e a ausencia de información transparente que garanta a seguridade xurídica durante este período de interrupción.
Por todo iso, o colectivo esixe:
- A reactivación inmediata da sede electrónica para os procesos de homologación e equivalencia.
- Información oficial transparente sobre o estado real dos expedientes.
- Medidas eficaces para evitar maiores atrasos acumulados.
- Garantías de igualdade de trato respecto doutros procedementos administrativos xa restablecidos parcialmente.
A organización tamén fixo público que, en lugar de responderlles a eles, o Ministerio optou por canalizar parte da información a través de respostas parlamentarias, con datos que o colectivo considera incompletos e pouco transparentes sobre expedientes e prazos.
En decembro de 2023 produciuse unha reunión co secretario xeral de Universidades, na que se presentou un chamado “plan de choque” para axilizar os procedementos. Con todo, Homologación Xusta Xa sostén que a realidade posterior —con atrasos que seguen superando amplamente o ano e novas paralizacións técnicas— demostra que as medidas anunciadas foron insuficientes ou non se aplicaron coa intensidade necesaria.
En 2025 o movemento seguiu alertando de máis de 100.000 solicitudes sen tramitar e de prazos dun a dous anos ou máis, pese ao novo marco legal que teoricamente debía axilizar as homologacións.
Escribe o teu comentario