A Xunta lávase as mans coa folga de autobuses na Coruña, con "portada" da patronal ao acordo

Este luns estaban chamados a sentar a negociar no Consello Galego de Relacións Laborais a patronal do sector do transporte de viaxeiros por estrada da provincia da Coruña cos sindicatos CIG, UXT e CC.OO., que abanderan as mobilizacións desde decembro en prol de desbloquear un convenio caducado desde hai xa catro anos e sometidos a continuos bloqueos no proceso de diálogo. A de hoxe prometía ser unha reunión decisiva, pero se resolveu achegando o conflito aínda máis a unha folga indefinida que a Xunta de Galicia non parece preocupada por evitar.

SEN ACORDO E CON DISTANCIA

O encontro estivo marcado polas evidentes distancias que existen entre as partes, a pesar da ameaza de que o próximo 2 de febreiro, e despois de dez xornadas de folga na que os usuarios sufriron os paros nos autobuses -chegando, mesmo, a reunir firmas contra a patronal-, a folga pasará a ser indefinida.

"Non hai ningún avance, quedou todo en preliminares, a patronal vólvese a levantar da mesa alegando as mesmas desculpas que cando se levantou a outra vez, é unha portada á negociación, ao presidente da Xunta e aos usuarios e usuarias", lamenta Ernesto López, representante de CIG-Transportes, que a semana pasada, en conversación con Galiciapress , non dubidou en criticar a postura dos empresarios, encabezados por Raúl López, presidente de Monbus, ao que cualificou de "mafioso e gánster". 

"Raúl López é un mafioso e un gánster co 51% da mesa. E cando tes que falar co máximo expoñente do sector, negociamos cun señor que se cre que estes é o salvaxe Oeste e vai coa pistola no cinto", declararon entón desde a CIG, que non estará moi contenta co resultado da mediación tras non achegar posturas e tras concluír sen outra data para un novo encontro.

Así as cousas, o sindicato galego cre que os empresarios volven facer gala dunha posición "irresponsable" por pór sobre a mesa "uns presuntos actos vandálicos dos que non achega proba nin feitos concretos", escusa empregada pola patronal para levantar da mesa. 

"TEÑEN QUE PÓR DE ACORDO ELES"

Mentres todo isto tiña lugar, o presidente da Xunta de Galicia, Alfonso Rueda, compareceu ante os medios tras a celebración do Consello da Xunta. Cuestionado por este conflito que afecta a miles de viaxeiros, incluídos estudantes afectados por unha folga que puxo en xaque o servizo de autobuses escolares, o mandatario subliñou que este é "un conflito entre a patronal do transporte e os seus traballadores". 

"A Xunta ofreceu o Consello de Relacións Laborais como instrumento mediador; os que teñen que pór de acordo son eles", despachou Rueda, á vez que reiterou, como xa fixo a semana pasada, que se debe "cumprir a lei" en relación aos servizos mínimos establecidos polo Goberno de Galicia, pois "deben ser respectados e en moitos casos non se estaban respectando".

"Un conflito entre unha empresa e os seus traballadores non se pode solucionar intervindo unha administración se o que se pretende desa administración é que poña o diñeiro que lle están reclamando ás súas empresas", inferiu Rueda, que volveu recalcar que desde a Xunta se mostrarán "inflexibles na esixencia do cumprimento da normativa, pero non podemos substituír o papel de ningunha das dúas partes". 
 

Contra a xestión da administración galega tamén tivo palabra Ernesto López a pasada semana, considerando que o Goberno de Galicia estaba a facer "o que un mal porteiro de fútbol". "Son o porteiro de fútbol malo, ao que lle tiran un balón e fai a estatua. Eles non fan nada por parar o balón. Se o tenta parar e non o para, bo, pero é que se están quedando quietos e iso é inaceptable e convérteos nos máximos culpables", criticou López, á vez que salientaba que "a titular das liñas" é a propia Xunta.