O "colapso" do CHUAC, que o SERGAS matiza, apunta a un segundo pico da gripe tras nadal
Os datos estatais indican que a gripe e outras enfermidades respiratorias estaban en retroceso a final de ano. Con todo, os problemas no CHUAC e outros hospitais apuntan a que as aglomeracións de Nadal van provocar un repunte dos contagios, por que os problemas nas urxencias coruñesas é probable que se repitan noutros hospitais. De feito, os traballadores do Cunqueiro denuncian que no seu hospital moitos pacientes con camas asignada teñen que pasar días en urxencias. En Santiago tamén se están producindo sobrecargas.
O incremento de casos de gripe e outras infeccións respiratorias ha disparado a demanda nas urxencias do Complexo Hospitalario Universitario da Coruña (Chuac). Mentres os traballadores denuncian unha situación de “colapso grave e continuado”, o Sergas defende que a atención está garantida e que o plan de inverno funciona a pleno rendemento.
As últimas xornadas saldáronse cunha alta afluencia de pacientes no Chuac, especialmente entre persoas maiores e menores con infeccións respiratorias. Segundo datos do propio Sergas remitidos a Galiciapress , sesenta pacientes permanecen ingresados actualmente con gripe neste complexo, que concentra boa parte da atención hospitalaria do norte de Galicia.
A onda epidémica continúa en ascenso, unha tendencia que xa advertira o conselleiro de Sanidade, Antonio Gómez Caamaño, quen alertou antes das festas do Nadal dun posible segundo pico epidémico tras as vacacións. Datas nas que as reunións sociais disparan as posibilidades de contagios de virus respiratorios como a gripe, a covid ou o VRS.
Desde a Consellería de Sanidade insisten en que estas cifras son habituais nesta época do ano e que “a asistencia está garantida” grazas ao plan de inverno activado en toda Galicia. Segundo fontes do Sergas, o hospital coruñés ha posto en marcha medidas organizativas relacionadas cos niveis de sobrecarga e demanda asistencial, mantendo operativos todos os seus recursos dispoñibles.
Os traballadores denuncian saturación extrema
A Comisión de Centro do Chuac presentou un comunicado no que alerta dun “colapso grave e continuado” no servizo de Urxencias, que aseguran sofren desde os primeiros días de 2026. Segundo esta representación do persoal, a presión asistencial non deixa de aumentar e a suposta falta de resposta da xerencia agrava o problema.
Ao mediodía deste mércores, o colectivo cifraba en máis de 240 os pacientes atendidos simultaneamente, dos cales 68 agardaban unha cama libre en hospitalización. Na súa opinión, trátase dunha “saturación total” que repercute tanto na calidade do servizo como na saúde do persoal sanitario, sometido a unha sobrecarga extrema e a condicións que cualifican de inseguras.
A xerencia da área sanitaria da Coruña e Cee recoñeceu unha “maior demanda asistencial”, pero defende que non existe un colapso estrutural, subliñando a activación dos protocolos previstos no plan de inverno. Sanidade sostén que se trata dun período puntual de alta presión sanitaria causado pola coincidencia de gripe, bronquiolitis e outros virus respiratorios.
Unha epidemia en crecemento en toda Galicia
O impacto da gripe estacional déixase sentir en todos os hospitais galegos, aínda que con especial intensidade na comarca coruñesa e en Vigo. De acordo cos últimos datos do Sergas, o nivel de circulación do virus segue sendo elevado, e as previsións apuntan a que podería #manter durante varias semanas antes de remitir.
Desde os servizos de saúde lémbrase que as urxencias hospitalarias atravesan tradicionalmente os días de maior afluencia nestas datas e que se mantén a recomendación de acudir á PAC ou centros de saúde en casos leves. O conselleiro Caamaño reiterou hai uns días que “o sistema galego de saúde está a responder con eficacia” ante esta onda de infeccións respiratorias.
Cúal é a situación das enfermidades resipiratorias a nivel estatal?
A última semana de 2025 pechouse cun descenso xeneralizado das infeccións respiratorias agudas (IRA) en Atención Primaria, segundo o sistema de vixilancia SiVIRA. A taxa nacional situouse en 573,6 casos por 100.000 habitantes, fronte aos 837,9 da semana anterior.
Na última semana de 2025 a síndrome gripal descendeu (105 fronte a 193,3 casos/100.000 h), mantendo unha intensidade epidémica baixa tras superar o limiar epidémico na semana 47.
Os problemas no CHUAC apuntan a un repunte tras o Nadal, algo que era de esperar respecto da melloría de final de ano. Hai que ter en conta que a propia natureza das enfermidades respiratorias e o funcionamento do sistema estadístico fai que haxa un atraso de varias semanas entre a situación nas consultas e as cifras nas estatísticas.
Por patoloxías específicas, última semana do pasado ano:
- COVID-19 (síndrome): 2,2 casos/100.000 h (en descenso).
- Bronquite e bronquiolitis en menores de 5 anos: 362,9 casos/100.000 h (tamén á baixa).
- En canto ás probas diagnósticas, a porcentaxe de positividad foi do 41,7% para gripe, 1,4% para SARS-CoV-2 e 9,1% para o virus respiratorio sincitial (VRS).
Os cálculos de incidencia (proxies) estiman:
- Gripe: 239,2 casos/100.000 h (baixa respecto de 403,9).
- COVID-19: 8 casos/100.000 h.
- VRS: 52,2 casos/100.000 h.
En hospitais , a taxa de IRAG foi de 22,9 casos/100.000 h, moi similar á semana anterior. A positividad aumentou lixeiramente para gripe (43,2%) e SARS-CoV-2 (1,8%).
As taxas estimadas de hospitalización foron:
- Gripe: 9,9 casos/100.000 h.
- COVID-19: 0,4 casos/100.000 h.
- VRS: 3,1 casos/100.000 h.
Desde o inicio de tempada (semana 40/2024), os casos hospitalizados por gripe presentan un 19,9% de pneumonía, un 4,2% de ingreso en UCI e un 4,6% de letalidad. En COVID-19, estes valores son do 24,3%, 3,6% e 10,3%, respectivamente. Para VRS, o 11,8% cursa con pneumonía, o 9,2% require UCI e a letalidad é do 0,8%.
Escribe o teu comentario