Gran protesta de vixiantes encargados da seguridade privada sanitaria ante a Consellería de Sanidade

Ao redor dun centenar de persoas concentráronse este mércores ante a Consellería de Sanidade, convocados polos sindicatos USO e UXT, para denunciar a "grave situación de inseguridade" que sofre o persoal de seguridade privada nos centros sanitarios públicos de Galicia, "agravada polo incremento de agresións, falta de medios, ausencia de protocolos eficaces e abandono de responsabilidades por parte da Administración".
 

"Estamos un pouco ata as orellas de tantas agresións no Sergas. Estamos a reivindicar que non sigan atacando aos nosos compañeiros e que poñan máis medidas de seguridade, que cambien as condicións que ten o Sergas cos traballadores de seguridade, que son máis de 300 vixiantes en toda Galicia", demandou Juan Carlos Tajes, de UXT.

Concretamente, pediu unha maior coordinación entre centros por parte do Sergas, apuntando que non todos contan coa mesma equipamento, por exemplo. Apuntou tamén que, dado que as dotacións mínimas por centro de dous vixiantes son "recomendacións", non se cumpren.

Pola súa banda, o secretario de organización de FTSP-USO Galicia, Javier Souto, sinalou que xa solicitaron unha reunión coa consellería, "de momento sen resposta".
 

Ademais dunha mellora nas condicións de medios de protección, laborais e de remuneración, solicitan formar parte nas reunións de coordinación de seguridade e de prevención de riscos laborais, "como o fan os delegados ou a representación sindical dos sanitarios".

Ademais, avanzou que para os días 21 e 28 de xaneiro teñen previstas máis concentracións se antes non obteñen unha resposta por parte da Administración sanitaria.
 

Por último, insistiu en que veñen detectando, non só un aumento das agresións, senón que estas son de maior gravidade e xa habituais no día a día dos vixiantes de seguridade. Por iso, remarcan que é necesario que Sanidade aumente as dotacións dos contratos.