Protesta ante o HULA de veciños de Parga e Guitiriz polos recortes sanitarios que sofren

Veciños das localidades lucenses de Parga e de Guitiriz concentráronse este luns diante da porta principal do Hospital Universitario Lucus Augusti de Lugo (HULA) para protestar contra os "recortes" en materia de sanidade que lles deixaron con 2 médicos para atender a unha poboación de preto de 4.500 persoas e a eliminación do servizo médico no consultorio de Parga.
 

A concentración, na que se lanzaron varias proclamas para reclamar á Xerencia da área Sanitaria e de Atención Primaria a recuperación do servizo, estivo presidida polos representantes do tres partidos políticos da Corporación, PSOE, PP e BNG, que aprobaron conxuntamente unha moción no último pleno para reclamar a recuperación integral dos servizos médicos.

O grupo esperaba poder ser recibido polo Xerente da área Sanitaria, Ramón Ares, ou o de Atención Primaria, pero o primeiro estaba en Santiago e o segundo tiña reunións toda a mañá e non atendeu nin aos manifestantes nin aos organizadores.
 

Esta concentración súmase á realizada a pasada semana en Parga, ante o consultorio que se quedou só con servizo de enfermaría. A maior parte dos veciños acudiu a Lugo nun autobús fretado a medias entre o propio concello e a Comunidade de Montes, que tamén apoia estes actos reivindicativos.

Este novo episodio chega tras un longo historial de peches e reaperturas do consultorio desde a pandemia. Durante a crise sanitaria, o Sergas clausurou o centro argumentando que se pretendía centralizar a atención debido á elevada incidencia da covid, unha decisión que xerou un enorme malestar entre os veciños e derivou en concentracións, protestas continuadas e reclamacións formais ante o Sergas. O asunto chegou mesmo ao Parlamento galego.

A reapertura tardou anos, xa superada a pandemia, pero produciuse sen recuperar todos os servizos previos e con períodos intermitentes de funcionamento, o que mantivo a preocupación da veciñanza, que reclama máis profesionais e denuncia a evidente falta de facultativos que sofre Parga.

Tanto os veciños como os representantes políticos reclaman ao Sergas tanto o feito do peche realizado desde o día 1 de decembro do consultorio de Parga, como o recorte da atención sanitaria, pasando de ter cinco médicos para atender a todo o termo municipal (3 en Guitiriz e 2 en Parga) a 2 en total, xa que un está de vacacións, outro de baixa e ademais estase procedendo ao concurso de traslados.
 

Seguindo a normativa, os dous facultativos están agora en Guitiriz, pero os veciños tamén están molestos pola forma na que procedeu o Sergas, que non mandou comunicado nin aviso de ningún tipo e "simplemente puxo un papel na entrada do consultorio", explica a alcaldesa de Guitiriz, Marisol Morandeira.

Ademais, lamentan os restrasos que se producen nas consultas, de até quince días de espera "aínda que están a dobrar quendas e tamén prolongando as xornadas para tentar atender a todos", remarcan desde o BNG.

O representante do Partido Popular en Guitiriz, José Manuel López, tamén se sumou á concentración veciñal. "Porque eu débome aos veciños e debo estar con eles, facéndolle chegar ao Sergas cales son os motivos de queixa e tamén contándolles aos afectados as explicacións que dan", dixo.

López explicou que a situación que se está producindo en Guitiriz está derivada da toma de prazas dos novos docentes, os cambios de destinos e a falta de médicos nas listas para cubrir baixas e vacacións. "Desde o Sergas aseguran que se trata dunha situación puntual nestas datas e que unha vez superada o Nadal volverase a recuperar o servizo completo con dous médicos en Parga e servizo de enfermaría", sostivo.

López engadiu tamén que si ve criticable a forma de comunicar o ceso do servizo durante este tempo "a través dun cartelito na porta do edificio".