Medio Rural inicia os traballos para evitar a erosión mediante acolchados de palla

A Consellería do Medio Rural realiza acolchados de palla en zonas afectadas por incendios forestais deste verán para facilitar a restauración das áreas queimadas e protexelas da erosión e evitar ecorrentías.

A previsión da Xunta, segundo indicou nun comunicado, é actuar en 200 hectáreas de terreo e previamente realizaron un levantamento topográfico e a localización, dimensionamiento e deseño de parcelas en zonas afectadas e con posibles riscos hidrológicos e erosivos.

As actuacións realízanas cun helicóptero con base no Barco de Valdeorras e céntranse en áreas afectadas da provincia de Ourense, especialmente na contorna de Valdeorras, por ser das máis sensibles á posibilidade de que se rexistre erosión no solo.

Ao mesmo tempo, realizan traballos en pistas danadas, incluíndo as cunetas e as obras de paso para mellorar a capacidade de evacuación das augas.