O PSOE busca unha reforma da Constitución para protexer o dereito ao aborto

O Goberno impulsará unha reforma da Constitución española para incluír nela o dereito ao aborto, co obxectivo de consagrar a liberdade e autonomía das mulleres. Segundo informaron fontes do Executivo a Europa Press, a proposta levará a cabo a través dun procedemento de reforma ordinaria, o que esixirá alcanzar unha maioría cualificada no Parlamento. É dicir, necesitaría o apoio do PP, o que porá nun brete aos conservadores.

O Concello de Madrid está no centro dunha polémica porque aprobou unha proposta de Vox, co apoio do PP, para que os espazos públicos municipais (centros de saúde, espazos de Igualdade, servizos sociais…) informen de forma “obrigatoria, verbal e escrita, permanente e visible” sobre o que chaman a “síndrome post-aborto” ou “trauma post-aborto”. 

 A iniciativa inclúe distribuír folletos, carteis e empregar páxinas web oficiais para alertar de posibles consecuencias psicolóxicas negativas do aborto, talles como culpa, ansiedade ou problemas de saúde mental, argumentando que moitas mulleres non coñecen eses efectos. 

Con todo, esta medida xerou forte rexeitamento. Expertos sanitarios, organizacións feministas, sindicatos e partidos da oposición sosteñen que non existe respaldo científico para esa suposta síndrome, que se trata máis ben dun discurso ideolóxico que estigmatiza e culpabiliza ás mulleres que deciden interromper un embarazo.  Ademais, critícase que obrigar aos profesionais municipais a difundir información que podería ser errónea vai en contra da ética profesional, pode xerar medo innecesario e danar a saúde mental das mulleres. 

 O alcalde, José Luís Martínez-Almeida, despois da polémica, recoñeceu que a “síndrome posaborto” non está avalado cientificamente, e matizou que a información será proporcionada por profesionais do Concello e que non conteñen datos falsos, coa intención de acougar as críticas.

España sería o segundo país do mundo en facelo

De aprobar, España converteríase no segundo país do mundo en recoñecer o dereito ao aborto na súa Carta Magna, despois de que Francia o incorporase en 2024. O Goberno argumenta que con esta iniciativa busca blindar este dereito fronte a “calquera intento de retroceso futuro que ameace os dereitos das mulleres”.

Loita contra a desinformación

Xunto a esta reforma constitucional, o Executivo tamén pretende actuar contra a desinformación ao redor da interrupción voluntaria do embarazo. Neste sentido, prevé modificar o Real Decreto 825/2010, co fin de impedir que as mulleres reciban información falsa ou carente de evidencia científica durante o proceso.

A formulación abre unha nova fronte de debate político e social en España, dado que a reforma constitucional requirirá de amplos consensos parlamentarios para saír adiante.