Axuda para Fraco, can que pasou 11 anos na protectora de Vigo e perdeuse xusto cando o ían adoptar
A historia de Fraco, un can mestizo de pequeno tamaño que pasou máis dunha década na Protectora de Vigo, 11 anos en concreto, conmoveu a veciños e voluntarios tras a súa inesperada desaparición xusto antes de comezar unha nova etapa cunha familia adoptiva.
Fraco, coñecido polo seu carácter afectuoso, levaba 11 anos agardando unha oportunidade no refuxio vigués. Finalmente, unha familia interesouse nel e viaxou expresamente para adoptalo, ilusionada con ofrecerlle un fogar definitivo tras tanto tempo de espera.
A desaparición produciuse nos días previos á entrega oficial, durante un proceso de sociabilización nunha vivenda de Bora, na parte máis interior e montañosa do Concello de Pontevedra, onde Fraco se asustou e logrou escapar.
Desde entón, a procura intensificouse na zona, con voluntarias de Pontevedra e Vigo percorrendo camiños, pegando carteis e contactando con residentes locais nun esforzo por dar co seu paradoiro. Tamén se tratou de contratar un equipo especializado de procura con cans, pero as choivas destes dias desaconsellan esta opción, debido a que o rastro podía ser borrado.
Chamamento á colaboración cidadá
A procura de Fraco non deu os resultados esperados até o momento, e a preocupación crece entre quen seguiron o seu caso. As voluntarias insisten na necesidade da colaboración de toda a comunidade, pedindo a máxima difusión da imaxe e descrición do animal en redes sociais, colexios, instalacións deportivas e calquera contorna onde poida ser visto.
Voluntarios da provincia lembran a importancia da adopción responsable e o seguimento especializado durante as primeiras fases de integración no novo fogar.
Escribe o teu comentario