Piden o reacollo das persoas sen fogar que non poden entrar na antiga estación de buses de Vigo

O valado das instalacións da antiga estación de autobuses de Vigo, na Avenida de Madrid, levou a que este domingo se realizase unha concentración para esixir o reacollo das persoas sen fogar que viven alí e que se faga un "censo inmediato" das persoas que viven na rúa na cidade olívica.

Os presentes, convocados polo foro socioeducativo Vos Niguéns, cargaron contra a Xunta e o Concello de Vigo e criticaron a "omisión constante" das competencias de vivenda que teñen o Executivo galego.

"Lembramos que a vivenda pública non é o mesmo que a vivenda social, de feito neste momento non hai vivenda social na cidade de Vigo", alertaron.

Neste sentido, propuxeron que o edificio da antiga estación de autobuses sexa dedicado a crear un albergue, xa que os que hai na cidade "están colapsados".

"Se estas reivindicacións non se atenden serán por unha conduta institucional cruel e contraria á Constitución e aos dereitos humanos", sinalaron desde Vos Ninguéns.

Así mesmo, avanzaron que este luns acudirán ao Concello e á Xunta para solicitar, por escrito, un "reacollo inmediato" desas persoas.