MUFACE: O goberno modifica a súa oferta a última hora para captar a Adeslas

A escasos días de que venza o prazo para a adhesión ao convenio sanitario de Muface, o Goberno redobra esforzos para convencer a Adeslas de que reconsidere a súa decisión de non participar. A aseguradora, que presta servizo ao 33% dos mutualistas, comunicou a finais de 2024 que non concorrería á licitación debido ás perdas económicas que esta cobertura xera.

O Ministerio introduciu cambios na proposta inicial para ofrecer garantías ás aseguradoras. Segundo fontes próximas á negociación citadas por Expansión esta mañá, propúxose un mecanismo que permitirá restablecer o equilibrio económico do convenio en caso de perdas derivadas de erros de cálculo nos custos asumidos por Muface . Esta nova fórmula substituiría a cláusula anterior, que unicamente contemplaba compensacións por cambios extraordinarios e imprevisibles.

A medida responde as demandas expostas por Asisa, que consideraba insuficientes as condicións establecidas polo Ministerio de Función Pública nunha carta vinculante remitida á aseguradora, que simplemente falaba de compensar ás aseguradoras se ocorría " o aumento do prezo dos actos médicos producido por unha situación de inflación moi superior á prevista no contrato, ou a aparición dunha situación sanitaria que incremente significativamente a frecuencia na prestación do servizo sanitario" . É dicir, situacións extraordinarias como a alza de prezos tras a invasión de Ucraína ou a pandemia da covid-19.  

A nova oferta da Administración sería un compromiso de pagar máis sempre que se demostre que os custos se dispararon, sexa cal fose a causa, co que os cálculos do convenio xa non serían aplicables, habería que pactar uns novos. Con este movemento de última hora, o Executivo confía en que esta revisión poida inclinar a balanza e convencer a Adeslas, cuxo rexeitamento sería un golpe case mortal para o sistema mutualista. 

Aínda que segue sen confirmalo, parece que Asisa está disposta a competir. Con todo, a Administración sabe que a cooperativa levantina non ten o tamaño suficiente para asumir de golpe todos mutualistas. Por exemplo, en Galicia non chega ao 5% dos asegurados en ningunha provincia.

Conseguirá o Goberno atraer a máis aseguradoras ou terá que lidar con outra crise no sistema asistencial tras decaer onte a subida das pensións? O ministro de Transformación Dixital e Función Pública, Óscar López  confía que algunha das tres aseguradoras implicadas —Adeslas, Asisa e DKV— participe finalmente no novo concerto. "Incrementamos un 33% o orzamento, até superar os 1.000 millóns de euros en tres anos", destacou López esta mañá nunha entrevista en Onda Cero.

O mércores, 29 de xaneiro, o ministro López comparecerá no Senado, a petición do PP, para detallar a situación do convenio de Muface. O plan de López parece ser tentar que non haxa unha nova prórroga do concurso, cuxo prazo para recibir acababa o día 12 e agora termina este luns ás 10 da mañá.  

Que peso ten cada unha das tres aseguradoras?

O intento de convencer a Adeslas    explícase porque é a máis potente das tres, con 508.703 mutualistas en Espaaña, máis do 33% do total. Sobre un 30% está cuberto pola Seguridade Social mediante os sistemas públicos.  Asisa conta con 363.946  asegurados, mentres que DKV atende a uns 200.000.  

O problema de contar só con Asisa é que o seu peso está moi localizado na súa zona de orixe, Levante, e Andalucía. En Galicia a súa presenza é moito menor.

Distribución por aseguradora en cada provincia de Galicia

A Coruña:

  - SegurCaixa Adeslas: 79,3%

  - DKV: 16,6%

  - Asisa: 4,1%

Lugo:

  - SegurCaixa Adeslas: 87,6%

  - DKV: 8,4%

  - Asisa: 4%

Ourense:

  - SegurCaixa Adeslas: 60,1%

  - DKV: 37,2%

  - Asisa: 2,7%

Pontevedra:

  - SegurCaixa Adeslas: 92,6%

  - DKV: 5,2%

  - Asisa: 2,2%

 Distribución por provincias

- A Coruña: 42.961 mutualistas (30.869 titulares e 12.092 beneficiarios)

- Pontevedra: 31.465 mutualistas (22.293 titulares e 9.172 beneficiarios)

- Ourense: 12.320 mutualistas (9.075 titulares e 3.245 beneficiarios)

- Lugo: 13.458 mutualistas (10.316 titulares e 3.142 beneficiarios)

- Total Galicia: 101.030 mutualistas

 Atención entre aseguradoras e SERGAS

- SERGAS: Atende ao 37,54% dos mutualistas galegos (37.931 persoas)

- Aseguradoras privadas: Atenden ao 62,46% restante (63.099 persoas)