Adolescentes enfermos levan dous meses sen clases presenciais na aula pediátrica do Álvaro Cunqueiro

A volta ao cole tivo lugar o pasado 11 de setembro...para case todos. Pasaron xa máis de dous meses desde o reinicio das clases e a volta ás aulas. Con máis ou menos apuros nalgúns sitios que outros, os alumnos xa están en dinámica do curso 2024/25. Non agarrei na aula hospitalaria do Álvaro Cunqueiro de Vigo, onde este curso os alumnos de Secundaria non sacaron os cadernos. A pesar das promesas da Xunta , o centro segue sen un profesor para os adolescentes ingresados na área infanto-xuvenil do hospital vigués.

PROMESAS INCUMPRIDAS

Galiciapress expuxo está cuestión ao presidente da Xunta hai un mes e o mandatario, Alfonso Rueda, prometeu a busqueda dunha solución inmediata. Un mes despois desas declaracións e dúas desde a volta ao cole, nada cambiou, até o punto de que tivo que ser a deputada do BNG Cristina Fernández a que consulte no Parlamento que pasa para que non se contrate a, polo menos, un docente para prestar este servizo de maneira asistencial, como reclama o Sindicato de Traballadoras e Traballadores do Ensino (STEG), que denunciou tanto a situación do Álvaro Cunqueiro como dos estudantes en réxime de día do Nicolás Peña, tamén de Vigo. 

Desde STEG cualifican o caso como unha "situación de abandono escolar" e que a Consellería de Educación "está a infrinxir gravementente a Carta Europea das Nenas e Nenos Hospitalizados (Resolución A2-25/86 de 13 de maio de 1986 do Parlamento Europeo)", xa que estaría a vulnerar un dereito fundamental como é o da educación. 

A IMPORTANCIA DE TER CLASE PRESENCIAL

A aposta do Goberno de Galicia, até agora, foi dar esta asistencia de maneira telemática, algo que non aconsellan os profesionais sanitarios, xa que as dinámicas que se desenvolven na aula e a rutina son un factor que en moitos casos axuda á recuperación dos pacientes. Ademais de STEG, representantes da Plataforma Adoece, que integra ás familias destes mozos, ou Foanpas de Vigo asistiron á sesión plenaria deste martes 19 de novembro. 

O sindicato reprocha ao conselleiro Román Rodríguez a resposta "vaga" e a súa "falta de empatía" á hora de explicar os motivos polos que se está atrasando tanto esta situación, algo que responde á busqueda dun "perfil axeitado para cubrir esas necesidades"

"Sabemos que se recortou unha docente que o curso pasado servía de enlace cos centros educativos onde están escolarizados estes pacientes. Esta figura, que no curso 2024-25 non é renovada, axudou enormemente a achegar unha normalidade no campo educativo aa estes pacientes. Os distintos informes psiquiátricos recomendan que manteñan contacto coa realidade, o que axuda enormemente a súa recuperación", reiteran desde STEG, que reclama a incorporación urxente dun profesional especializado en Pedagoxía Terapéutica que atendería ás necesidades educativas "deste alumnado tan vulnerable".

Por agora, as solicitudes caeron en saco roto e o sindicato reprende á Xerencia do Hospital Álvaro Cunqueiro pola súa "actitude de desprezo absoluto polo sufrimento das familias e das persoas menores ingresadas"