Un xuíz multa a unha avogada da quenda de oficio por negar a prestar asistencia alegando o seu dereito á folga

Falta menos dunha semana para que se cumpran 365 días de folga entre os avogados e procuradores da quenda de oficio. Un ano de folga indefinida nun sector que leva meses reclamando ás administracións públicas que senten a negociar dunha vez por todas as melloras laborais e salariais dun colectivo que presta un servizo fundamental ao garantir un dereito como é o da asistencia xurídica gratuíta. Neste tempo vivíronse episodios de tensión con manifestacións, baixas masivas nos xulgados ou mesmo expedientes, como os que se abriron contra dous avogados en Ourense por secundar a quenda de oficio. Os xulgados foron un paso máis aló na provincia e agora o Tribunal Superior de Xustiza de Galicia informa dunha multa a unha avogada que fixo uso do seu dereito á folga.

180 EUROS DE MULTA

O Xulgado de Instrución número 1 de Ourense acordou a sanción de 180 euros á letrada, multa da que agora se fai eco o TSXG. Os motivos, segundo o xuíz, son non atender ao requirimento, datado no pasado 2 de outubro, para asistir á declaración como investigado dun cliente. 

Nesa ocasión, a agora sancionada, comunicou que non asistiría á declaración "por exercer o lexítimo e fundamental dereito de folga". Nesa liña, anotou que o procedemento debería ser suspendido até, polo menos, a desconvocatoria da folga, que a próxima semana cumprirá un ano de vixencia. A avogada non atendeu ás advertencias das sancións que se lle poderían impor e mantívose asino: non prestou a asistencia ao investigado. 

"En relación aos argumentos esgrimidos pola letrada, debe indicar que non hai ningunha disposición legal que ampare o dereito á folga dun avogado en relación aos asuntos que se lle atribúan pola quenda de oficio, nin existe ningunha resolución xudicial ditada por un órgano pertencente á xurisdición social que recoñeza devandito dereito a folga, nin consta que se instou polos responsables da convocatoria da folga de letrados da quenda de oficio un recoñecemento do seu dereito a folga ante os tribunais da xurisdición social", explica o maxistrado no acordo, á vez que detalla que este é un criterio establecido pola Audiencia Provincial de Ourense seguindo a doutrina do Tribunal Constitucional.

"Atopámonos ante unha instrución penal, que está suxeita aos prazos que establece o artigo 320 da Lei de Enjuiciamiento Criminal", abunda o xuíz, considerando que a incomparencencia polo dereito á folga "non é causa de suspensión dos devanditos prazos e, moito menos, causa para prorrogar a instrución". 

"UN PERÍODO DE TEMPO INDUBIDABLEMENTE LONGO"

Na mesma liña, sinala o "prexuízo" en forma de dilación que "upone devandito posicionamento en favor dun dereito a folga que este instrutor non recoñece". "O feito de que a folga invocada pola letrada só afecto aos asuntos que defende na súa condición de avogada da quenda de oficio", destaca o escrito do xuíz. 

A rengló seguido, o maxistrado manifesta que a letrada "pode estar en situación de folga de forma indefinida dado que os ingresos que se derivan da quenda de oficio son unha mínima parte do total e, por tanto, non é axustado a dereito unha folga desta natureza, posto que pode manter nesta situación durante un período de tempo indubidablemente longo".