SOS Sanidade Pública anuncia protestas para este 26 de abril en toda Galicia en defensa da Atención Primaria

A plataforma, que impulsa unha IPL en defensa da sanidade pública, anunciou esta mañá protestas para esta semana e para o próximo 9 de maio ante o Parlamento de Galicia. 

Nesa liña, cargou con dureza contra o acordo alcanzado pola Xunta e CESM que puxo fin á folga dos sanitarios: "É un fracaso; Sempre reivindicamos a dedicación exclusiva"
 

A Plataforma SOS Sanidade Pública manifestou que o acordo alcanzando entre a Consellería de Sanidade e a Conferencia Estatal de Sindicatos Médicos (CESM) foi "un fracaso rotundo". "Ao final foi un acordo salarial que só beneficia aos profesionais médicos", lamentou o portavoz da plataforma, Manuel Martín.

Entre outras cousas, explicou que están "en desacordo" con "acabar coa obrigatoriedade da dedicación exclusiva na sanidade pública", ademais de "xeneralizar" o complemento "só aos médicos que xa traballaban na pública e na privada". "Estamos en contra. Sempre reivindicamos a dedicación exclusiva", insistiu.

Nunha rolda de prensa celebrada este luns no Centro Sociocultural Fontiñas, Manuel Martín subliñou que o sindicato CESM "apoiouse" na mobilización social do pasado mes de febreiro para "convocar de maneira unilateral unha folga de maneira oportunista".

Pola contra, reivindicou o acordo da mesa sectorial que "mellora as condicións laborais e salariais de todos os traballadores da atención sanitaria pública". "Hai unha diferenza importante", apuntou antes de engadir que esa é unha proposta "para facer melloras a todo o persoal", mentres que os acordos co CESM son "medidas de natureza moi corporativa".

"INACEPTABLE"

Neste contexto, Manuel Martín tachou de "inaceptable" a "falta de resposta" da Consellería de Sanidade á "inmensa mobilización" que representa para a plataforma a iniciativa lexislativa popular para salvar e fortalecer a Atención Primaria, para a que recolleron "50.000 firmas", así como a manifestación do 12 de febreiro na que "houbo máis de 50.000 persoas manifestar na Praza do Obradoiro".

"A resposta da Consellería foi o menosprezo. O señor Rueda dixo que ía ir a comer o cocido a Lalín. Paréceme unha resposta inadecuada aos miles de galegos que se manifestaron", censurou.

O portavoz da plataforma sinalou que a ILP está "cada vez máis vixente", xa que a situación "segue igual" ou "mesmo pode considerar que empeorou".

CONCENTRACIÓNS O DÍA 26

Por iso, lembrou que o vindeiro mércores, 26 de abril, hai convocadas mobilizacións en máis dunha vintena de localidades en apoio a esta Iniciativa Lexislativa Popular e "en contra da situación na Atención Primaria e do seu desmantelamento".

Así mesmo, avanzou que o próximo 9 de maio concentraranse fronte ao Parlamento coincidindo co debate na Cámara galega da ILP.

"Son medidas factibles", sinalou, que poden pór en marcha "sen sobrecusto de gasto público": que a consulta sexa sempre presencial salvo que o paciente diga o contrario ou sexa unha consulta para aclarar unha dúbida ou que haxa coordinación entre os servizos de atención primaria e hospitalario.

"Con estas medidas, pensadas e consensuadas, cremos que pode haber unha mellora. Son medidas que non van solucionar todo o problema que ten a primaria, que é un problema estrutural, de falta de persoal, de recursos e de mala organización. Temos un bo modelo, pero hai que melloralo e non desmantelalo", destacou.