Ferido un gandeiro corneado por un boi nunha leira en Cuntis
O home, de 61 anos, tivo que ser asistido por un helicóptero medicalizado.
Un gandeiro de 61 anos (M.C.C.) resultou ferido este mércores tras ser corneado por un boi nunha leira na aldea da Ermida, na localidade pontevedresa de Cuntis.
Dous veciños foron os primeiros en auxiliar á vítima alertados polos seus berros e deron aviso ás autoridades.
Segundo detallaron fontes do 112 Galicia consultadas por Europa Press, sobre as 10.30 horas os servizos de emerxencias recibiron a chamada dun particular alertando de que un boi golpeara a un home, que recibiu un forte golpe na cabeza e presentaba dores en pescozo e costas.
Mentres, o Servizo de Urxencias Sanitarias de Galicia-061 mobilizou até ao momento unha ambulancia e o helicóptero medicalizado con base en Santiago, que trasladou ao ferido ao Complexo Hospitalario Universitario de Santiago (CHUS).
Ademais, até o lugar desprazáronse efectivos de Protección Civil de Cuntis e axentes da Garda Civil e da Policía Local, así como o alcalde da localidade, Manuel Campos.
Fontes municipais sinalaron que debido á complexidade do terreo, o ferido tivo que ser trasladado uns 500 metros en padiola até o punto onde esperaba o helicóptero.
Escribe o teu comentario