(Vídeo) Un galego axudou ao clan dos Balcáns no desembarco dunha tonelada de cocaína en Vilaxoán

Nun operativo que marca un antes e un despois na loita contra o narcotráfico en Galicia, axentes da Policía Nacional e a Garda Civil interceptaron o alixo de 1.100 quilos de cocaína nas costas de Vilanova de Arousa. Durante a acción, oito persoas foron detidas, incluíndo a sete cidadáns albaneses relacionados co perigoso clan dos Balcáns, coñecido pola súa brutalidade e sofisticados métodos.

 O oitavo arrestado, un galego da comarca do Salnés, facilitaría apoio loxístico, como vehículos e comunicacións. No vídeo facilitado polas autoridades vese unha furgoneta branca e un todo terreo escuro, este último dentro da zona intermareal.

O operativo, denominado 'Operación Baroña', levou a cabo en múltiples frontes. Desde o aire, helicópteros vixiaban os movementos; por mar, unha patrulleira da Garda Civil interceptou a embarcación; e en terra, axentes arrestaron aos sospeitosos. Entre os detidos atópanse os catro tripulantes dunha lancha rápida de 12 metros de eslora e tres motores de alta potencia, así como tres persoas nas inmediacións da costa. Os tripulantes foron detidos a bordo, sen tempo de apagar os motores.

Un equipo do GEO da Policía Nacional levou a cabo a súa abordaxe no momento xusto no que se atopaba alijando en Rego do Alcalde en Vilanova de Arousa (Pontevedra).

A Policía indica que na Operación Baroña detivéronse incialmente sete persoas e incautouse máis dunha tonelada de cocaína, unha pistola do calibre 9 mm parabellum, dous vehículos, equipos de comunicación cos que se coordinaba o alijado e a embarcación de alta velocidade. O colega galego foi detido a posteriori.

Un clan perigoso e unha ameaza crecente
O clan dos Balcáns, orixinado en Albania e estendido por toda Europa, é unha das organizacións criminais máis temidas no continente. As súas operacións inclúen o tráfico de drogas, armas e persoas, e o seu modus operandi combina violencia extrema e estratexias loxísticas avanzadas. A entrada deste grupo en Galicia representa unha ameaza para un territorio que, historicamente, foi controlado por organizacións locais de narcotráfico.

Segundo expertos en seguridade, a presenza destas organizacións estranxeiras en Galicia podería alterar os equilibrios tradicionais do narcotráfico na  comunidade. Con todo, a detención dun galego, confirma as sospeitas dos  balcánicos colaboran con algún dos clans locais. 

O detido, segundo Narcodiario, é B.M.P, un veciño do Salnés vello coñecido das forzas da orde. Del sería o todo terreo que os narcos meteron no fondo da Ría para sacar a tonelada de cocaína que desembarcaron da planadora.

Un operativo internacional de varios meses

O golpe foi resultado de meses de investigación iniciada en novembro de 2024, cando as autoridades detectaron movementos sospeitosos no Salnés. A operación contou co apoio de axencias internacionais como a DEA estadounidense, a Policía Judiciaria de Portugal e a Aduana de Francia, unindo esforzos para desarticular esta rede. Ademais da droga, incautáronse unha pistola, vehículos e equipos de comunicación que serían empregados para coordinar a operación.

O desembarco directo nas costas galegas por parte dun grupo estranxeiro, algo sen precedentes, subliña a crecente importancia de Galicia como punto crave nas rutas de tráfico internacional. En decembro, outra lancha rápida con características similares e un tractor apareceron na mesma zona, o que reforza a teoría de que este enclave está a ser utilizado estratexicamente por redes internacionais.

Esta operación non é un feito illado. Hai apenas unha semana, en Vigo, foron detidos tres cidadáns belgas e seis albaneses vinculados a unha partida de 1.100 quilos de cocaína nun colector no porto. Ese suceso tamén se relaciona co clan dos balcanes.