Un incendio na rúa calcina varios coches e dana a fachada dunha vivenda en Vila de Cruces

O lume, declarado ao redor das 2:30 horas desta pasada noite, afectou a tres coches e á entrada dun edificio. 

Aínda que algúns veciños se viron afectados polo fume, as autoridades sinalan que non houbo que prestar asistencia a ninguén. 
 

Un incendio afectou a tres coches e provocou danos na fachada dun edificio da localidade pontevedresa de Vila de Cruces.

Segundo informa o 112, o lume causou danos materiais nos estantes máis próximos ao exterior do baixo comercial, que se viu tamén danado pola calor. Igualmente, rebentou parte da fachada e o fume afectou á xanela do primeiro piso.

Pouco antes das 2,30 horas da pasada madrugada, un particular contactou co 112 Galicia para explicar que estaba a arder un coche na Rúa Soto, en As Cruces. Á beira, había un edificio e máis vehículos estacionados.

O 112 Galicia solicitou a intervención dos bombeiros de Silleda, da Garda Civil e da Agrupación de Voluntarios de Protección Civil de Vila de Cruces.

Pouco despois, outros particulares chamaron ao 112 Galicia para explicar que o lume se propagou a outros dous coches e que xa afectaba á fachada do edificio máis próximo. De feito, un veciño do inmoble alertou de que, a pesar de ter as xanelas pechas, o fume estaba a entrar na súa vivenda.

Os bombeiros traballaron para apagar as chamas, tras o que comunicaron a relación de danos materiais sen que ningunha persoa necesitase asistencia sanitaria.