A Deputación de Pontevedra destina máis de 4 millóns de euros para a mellora do firme da rede de estradas

A Deputación de Pontevedra investirá máis de 4,4 millóns de euros en traballos de conservación de firmes de estradas provinciais, cuxos seis lotes acaban de ser adxudicados.

Segundo informou nunha nota de prensa, desenvolveranse dous tipos de actuacións. Por unha banda, nalgunhas estradas levarán a cabo traballos de fresado do firme para despois repor a capa de rodaxe e, noutras, executarase unha capa de microaglomerado en frío.

As obras a realizar abarcan tamén escavacións, levantado de firme e beirarrúas, saneos, fresados, recrecidos de pozos de rexistro, e, entre outras moitas actuacións, instalación de tubos. Ademais, en todas as actuacións nas que sexa necesario, procederase á reposición da sinalización horizontal.

"Seguimos sumando recursos para a mellora das estradas provinciais, vías fundamentais na vertebración do noso territorio, para garantir que os 1.700 km destas infraestruturas estean en condicións idóneas de seguridade e avanzar, así, na mellora da calidade de vida dos nosos veciños", asegurou o presidente provincial, Luís López.

INVESTIMENTOS
Desta forma, investirá preto de 650.000 euros en 6 estradas provinciais que atravesan Agolada, Dozón, Lalín, Rodeiro e Vila de Cruces; máis de 873.200 euros en 9 vías que atravesan Caldas de Reis, Cuntis, A Estrada, Forcarei e Silleda, e 636.300 euros en 11 estradas de Cambados, Meaño, Meis, Ribadumia, Sanxenxo e Vilanova de Arousa.

Ademais, destinará 873.700 euros a 20 vías que pasan por Bueu, Campo Lameiro, Cangas do Morrazo, Cerdedo-Cotobade, A Lama, Moaña, Moraña, Poio, Pontevedra, Redondela e Vilaboa; 724.400 euros en 12 estradas da Cañiza, Covelo, Mondariz, As Neves, Ponteareas e Salvaterra de Miño, e 685.000 euros en 10 estradas que atravesan Baiona, Gondomar, Redondela, O Rosal, Salceda de Caselas, Tui, Tomiño e Vigo.