A Xunta autoriza á universidade de Abanca a impartir Dereito, que xa hai nas tres universidades públicas

A Universidade Intercontinental da Empresa (UIE), institución privada vinculada a Abanca e con sedes na Coruña, Santiago e Vigo, anunciou a incorporación dun novo grao en Dereito . Esta titulación, actualmente en proceso de verificación, ofrecerase a partir do curso 2025-2026,  tras o visto e prace inicial da Xunta.

A noticia xerará polémica en Galicia, xa que o grao de Dereito xa está presente nas tres universidades públicas da comunidade: Universidade da Coruña (UDC), Universidade de Vigo (UVigo) e Universidade de Santiago de Compostela (#USC). Hai que lembrar que aprobación inicial da UIE por parte da Xunta en 2022 incluíra o compromiso de evitar competir directamente coas universidades públicas en titulacións xa consolidadas, algo que agora se pon en dúbida.

A lexislación autonómica esixe que as universidades de nova creación presenten un catálogo académico que sexa complementario e non redundante coas ofertas existentes. Neste contexto, valórase especialmente a conexión das novas titulacións con ramas emerxentes da ciencia e con necesidades profesionais inéditas. A UIE presenta esta nova titulación como "unha proposta innovadora e altamente especializada que se adapta á demanda de novos perfís profesionais".

Psicoloxía e outras duplicidades: denuncias e críticas de colectivos

Esta non é a primeira vez que a UIE afronta críticas por duplicar graos xa dispoñibles nas universidades públicas galegas. No outono pasado, o #BNG denunciou que a autorización do grao de Psicoloxía nesta universidade privada violaba a Lei do Sistema Universitario de Galicia (2013). Daniel Castro, deputado do Bloque, rexistrou unha iniciativa parlamentaria solicitando que a Xunta reconsidere esta autorización. Segundo o deputado, esta titulación xa se imparte na USC e a súa inclusión na UIE representa un incumprimento normativo.

Pola súa banda, o sindicato #CSIF Galicia expresou o seu rexeitamento cara á decisión de permitir á UIE ofrecer o grao en Psicoloxía, cualificándoo como un apoio implícito á privatización da educación. Segundo CSIF, a administración pública debería priorizar a mellora do sistema universitario público, que enfronta problemas de infrafinanciación, falta de recursos e precariedade laboral no seu persoal docente e administrativo.

Desde a UIE, con todo, defenden o seu modelo académico como unha oferta innovadora e especializada, orientada a cubrir a demanda de perfís profesionais emerxentes. Actualmente, a universidade imparte cinco graos, incluíndo Enxeñaría en Sistemas Intelixentes, Negocios Dixitais e Psicoloxía, xunto con másteres como o MBA e o de Tecnoloxía e Intelixencia de Datos Empresariais.

É probable que aumente a controversia universitaria

A inclusión do grao en Dereito foi informada no Consello Galego de Universidades, obtendo o visto e prace da Secretaría Xeral de Universidades da Consellería de Educación. Este grao será parte da  Facultade de Administración de Empresas e Dereito da UIE, que xa ofrece programas en Administración e Dirección de Empresas e en Negocios Dixitais.  

Vigo é un claro exemplo das tensións que provoca esta expansión. Desde 2025, os estudantes poderán elixir entre a oferta pública da UVigo no campus da cidade, situado nun lugar de difícil acceso, e a opción privada na sede da UIE no centro urbano, na Avenida de Madrid. Para sectores críticos, esta decisión fomenta unha competencia desigual entre os sistemas educativo público e privado.

Hai que ter en conta que a nova lexislación obriga ás universidades a ter certo tamaño, que esta universidade privada non alcanza. É probable, por tanto, que teña que lanzar novos títulos nos próximos cinco anos, que é o prazo que marca a lei para os centros xa en funcionamento alcancen un calibre mínimo.