O PPdeG agora reclama as competencias en materia de autorizacións de traballo para persoas migrantes

A portavoz de Emprego do Grupo Popular, Noelia Pérez, instou ao Goberno de España a traspasar a Galicia as competencias executivas en materia das autorizacións iniciais de traballo das persoas migrantes.

"Ante a falta de man de obra que existe na actualidade en moitos ámbitos empresariais, resulta intolerable que o Goberno de Pedro Sánchez castigue a estes traballadores atrasando sine die a tramitación do seu permiso para poder emprender a súa vida laboral en Galicia", indicou.

Nunha nota de prensa, os populares detallaron que este domingo a portavoz de Emprego reuniuse cunha emigrante venezolana en Ourense, quen lle trasladou "a odisea que viven para poder conseguir unha cita para tramitar o permiso de traballo e para que lles respondan á solicitude".

"Un dos máis significativos síntomas de que o Goberno de España está totalmente desconectado da realidade é o colapso administrativo que existe no acceso aos permisos de residencia e traballo para as persoas migrantes", concluíu.