O PSdeG irá á Fiscalía se non salgue toda a "verdade" na Comisión de contratos

O secretario xeral do PSdeG, José Ramón Besteiro, reafirmou este venres que os socialistas acudirán á vía xudicial se a Comisión de Investigación parlamentaria sobre a construción do Hospital Álvaro Cunqueiro e sobre contratos da Xunta "non serve para que a verdade saia á luz".

Así o trasladou en Lugo, nunha comparecencia ante os medios, acompañado pola alcaldesa, Paula Alvarellos, e pola deputada Lara Méndez.

Gómez Besteiro reiterou que o "escándalo" do sobrecusto de 470 millóns de euros do hospital vigués é unha das maiores mostras da "nefasta xestión" do PP, do mesmo xeito que os "contratos a dedo a familiares e amigos" de altos cargos 'populares' que, incidiu, "non son un caso illado", senón parte dun "sistema organizado que utilizou os recursos públicos para beneficiar aos próximos ao PP".

Besteiro puxo como exemplo da mala xestión o Álvaro Cunqueiro, cuxo sobrecusto podería financiar investimentos que Galicia necesita, como a electrificación da liña ferroviaria Lugo-Ourense. "O PP utiliza o diñeiro de todos os galegos para encher os petos dunha minoría, e iso é inaceptable. Esiximos respostas claras e responsabilidades políticas por este saqueo sistemático", proclamou o líder do PSdeG.

En referencia á Comisión de Investigación constituída no Parlamento, denunciou novamente que o PP "pretende convertela nun paripé" co "único obxectivo de tapar a verdade". Por iso, advertiu de que os socialistas non consentirán que a maioría parlamentaria dos 'populares' sexa "un obstáculo" e reiterou que o PSdeG utilizará "todos os mecanismos" á súa disposición para garantir a "transparencia".

"Se a Comisión non serve para que a verdade saia á luz, levaremos este caso á Fiscalía. Non descartamos ningunha medida para que se depuren responsabilidades políticas e xudiciais", remarcou, antes de subliñar que "Rueda non pode fuxir das súas responsabilidades", porque "os sobrecustos e os contratos a dedo non son anomalías, son a marca de gobernar do PP".