Feijóo dá a nota no inicio de curso político: "Non hai proxecto de país, senón de supervivencia do líder"

O presidente do Partido Popular, Alberto Núñez Feijóo, asegurou que o PSOE non ten un proxecto de país, senón "un proxecto de supervivencia política e xudicial do seu líder, Pedro Sánchez"; a lgoque considera que "xa lle está custando demasiado" aos españois.

Esta é unha das reflexións coas que arrincou o líder popular o curso político no xa tradicional acto de apertura celebrado este domingo no municipio pontevedrés de Cerdedo-Cotobade.

Considera Núñez Feijóo que a continuidade de Sánchez no Goberno non só custa "diñeiro público en empregos ficticios para sobriñas", senón tamén "a igualdade, liberdade e a solidariedade" do país.

"Un Goberno que busca culpables para todo e non se responsabiliza de nada; que elixiu trocear o Estado no canto de fortalecelo e así danar a igualdade e a solidariedade da nación", lamentou.

"España non pode renunciar a ter un lugar no mundo porque Sánchez non estea disposto a renunciar a seguir vivindo na Moncloa. Necesítase non só un cambio político, senón un cambio de valores", defendeu, tras o que se comprometeu a ser o que "limpe o bo nome da política que manchou o Goberno". "España non é este Goberno e volveremos entregar España aos españois", aseverou.