O incendio do vertedoiro da Rúa é asumido pola Deputación de Ourense cun contrato de emerxencia

A Deputación de Ourense asumirá a extinción do incendio forestal que afecta o vertedoiro municipal da Rúa desde hai dúas semanas e para iso realizou unha contratación de emerxencia dos traballos de extinción, dos que se fará cargo a empresa Tragsa.

Así o anunciou este sábado o presidente provincial, Luís Menor, que, acompañado da alcaldesa da Rúa, María Albert, desprazouse até o vertedoiro municipal. "Independentemente das nosas competencias, como Deputación estivemos sempre dispostos a cooperar e así o faremos, dando solución a unha emerxencia con total garantía nas obras", sinalou Menor.

A continuación, fixo referencia á "incapacidade técnica e económica" do Concello da Rúa para asumir os traballados da "complexa" extinción do incendio. Desta forma, a contratación, cun orzamento aberto, é para a propia extinción do incendio e será próximo aos 100.000 euros. Está previsto que os traballos de extinción, que comezarán o luns, finalicen "en poucos días".

Menor lembrou, segundo indicou a Deputación nun comunicado, que o informe e a UME "desaconsellou" no seu momento a extinción con medios propios. Por iso, os técnicos da Deputación e o Concello da Rúa, coa Xunta, analizaron "a mellor solución para o problema". A alcaldesa da Rúa apuntou que estes días viviu uns "momentos duros", agradeceu á cooperación da Deputación e trasladou o agradecemento aos veciños porque demostraron que colectivamente "conseguen as cousas".