Convocadas protestas en toda Galicia contra a guerra de Ucraína e a OTAN
Galiza pola Paz convoca mobilizacións simultáneas en sete cidades galegas para denunciar o aumento do militarismo e esixir unha alternativa pacífica.
A recentemente constituída Plataforma Galiza pola Paz anunciou unha xornada de mobilizacións o vindeiro mércores 9 de abril ás 19:30 horas, como resposta ao que consideran unha escalada bélica promovida desde as institucións estatais e europeas.
Baixo a lema “Contra o militarismo, a OTAN e a guerra”, as protestas terán lugar na Coruña, Compostela, Ferrol, Lugo, Ourense, Pontevedra e Vigo, co obxectivo de alzar a voz contra o gasto militar e a subordinación a estratexias de defensa da OTAN.
Sete cidades, un mesma mensaxe
As concentracións celebraranse de forma simultánea ao sete da tarde en puntos estratéxicos de cada urbe. Na Coruña, fronte á Delegación do Goberno; en Compostela, na Praza Roxa; en Ferrol, na Praza Vella, fronte ao arsenal militar; en Lugo, ante a Subdelegación do Goberno; en Ourense , tamén fronte á Subdelegación; en Pontevedra diante da Subdelegación do Goberno; e en Vigo, fronte ao museo MARCO.
Segundo explica a UPG, o partido máis importante dentro do Bloque Nacionalista Galego, o acto busca sinalar a crecente militarización do territorio galego, a implicación de Galicia nas infraestruturas de defensa da OTAN e o desvío de recursos públicos cara ao gasto armamentístico. Os convocantes denuncian que todo isto estase realizando “sen debate social” e á marxe das prioridades cidadás.
Chamamento á unidade fronte ao militarismo
A plataforma reclama unha resposta unitaria da sociedade galega fronte a unha tendencia que consideran perigosa: a conversión do territorio nun polo militar disfrazado de desenvolvemento económico. Ao seu xuízo, esta política non contribúe á paz, senón a reforzar unha lóxica de confrontación global.
Escribe o teu comentario