Represión e "condutas que rozan o acoso laboral" por parte do "despótico" xefe de AFAL Ferrolterra, denuncia CIG

Se xa a situación na Asociación de Familiares de Enfermos de Alzheimer de Ferrolterra (#AFAL Ferrolterra) xa é complicada de seu por todos os condicionantes que rodean a esta enfermidade, o escenario é cada vez máis caótico polas condicións de traballo nas que se atopa o equipo desta organización, que fixo unha denuncia pública a través das delegadas de persoal adscritas á #CIG.

"INDECENTE PRECARIEDADE LABORAL" E "CONDUTAS QUE ROZAN O ACOSO"

Segundo o escrito ao que tivo acceso Galiciapress, desde AFAL denuncian a "indecente precariedade laboral" que sofren os profesionais pola "aplicación dun convenio de categoría inferior" e a falta de persoal que obrigou a algúns traballadores a asumir tarefas que non lles corresponden pola súa categoría profesional. 

Ao tempo, desde a CIG denunciaron os "contratios precarios con xornadas parciais", "cambios constantes de quendas" ou "denegación de permisos retribuídos" nunha listaxe de irregularidades que xa foron postas en coñecemento de Inspección de Traballo.

"Tras a denuncia, que foi favorable á representación legal dos traballadores, a actitude do responsable da empresa, cuxo modus operandi é a mentira e a coacción, volveuse máis despótica", censuran desde o persoal, que interpretan que o clima que se xerou provocou que as empregadas soporten hoxe "un nivel de tensión psiclógico inaceptable, con condutas que rozan o acoso laboral". 

"Un exemplo desta conduta é a negativa da empresa a asinar as vacacións ao persoal, como medida de presión ante a unidade que as traballadoras e aos seus representantes legais mostran", apostilan desde a CIG, que neste ambiente de "malos tratos" o persoal teñen que "pasar o día loitando contra un miserable ao que pouco parece importarlle o día a día dos centros". A CIG, anuncian, "non tolerará estes abusos e denunciaremos pública e xudicialmente esta situación cantas veces sexan necesarias", o que deixa nunha situación moi delicada os servizos en AFAL Ferrolterra, unha organización con máis de dúas décadas de percorrido.