Atopan o corpo sen vida dunha muller maior na súa casa de Cabanas

Os servizos de Emerxencias localizaron este sábado a unha muller falecida, por morte natural, no seu domicilio de Cabanas, tras entrar na vivenda con axuda dos bombeiros, alertados polos achegados, que facía días que non a vían.

Segundo informaron fontes do Consorcio contra Incendios e de Salvamento da Coruña e do CIAE 112 Galicia, o achado produciuse ao mediodía deste sábado. Sobre as 13,40 horas o 112 recibiu un aviso da Garda Civil de Fene, solicitando a colaboración dos bombeiros para entrar nun piso da rúa Pinemar de Cabanas.

Os axentes pedían colaboración dos bombeiros para acceder á vivenda dunha muller maior que levaba días sen saír do seu domicilio, e que non respondía o teléfono.

Até o punto desprazáronse efectivos de bombeiros do parque provincial do Eume, así como do GES de Mugardos, ademais dos axentes da Garda Civil. Os bombeiros puideron entrar á vivenda desde un balcón lindeiro e, unha vez no interior, comprobaron que a muller estaba falecida.