O TSXG avala o despedimento disciplinario dun traballador de Pull & Bear por acoso e comportamento vexatorio

A Sala do Social do Tribunal Superior de Xustiza de Galicia (#TSXG) confirmou a validez do despedimento disciplinario dun responsable de deseño de Pull & Bear España S.A., con sede no polígono industrial de Río do Pozo, en Narón, tras desestimar o recurso de suplicación interposto polo traballador.

A sentenza, avala que a empresa actuou conforme a dereito ao extinguir o contrato por feitos cualificados como "moi graves", entre os que se inclúen acoso, ofensas verbais e físicas, e transgresión da boa fe contractual.

Os feitos probados revelan que o traballador, con categoría de responsable de deseño e antigüidade desde 2002, mantivo unha conduta continuada de carácter vexatorio e sexualmente inapropiada cara a polo menos un dos seus subordinados, a partir de xuño de 2023.

Entre os comportamentos acreditados figuran xestos obscenos, comentarios de índole sexual, tocamentos non consentidos, bicos e abrazos non solicitados, e a simulación de actos sexuais na contorna laboral. Tamén recolle que se dirixiu de forma inapropiada a unha modelo de patronaje, realizando comentarios sobre o seu aspecto físico.

A orixe do procedemento interno sitúase o 27 de xuño de 2024, cando o empregado afectado denunciou un episodio de invasión do seu espazo físico, berros e actitude ameazante por parte do seu superior ocorrido o 29 de maio. A investigación, canalizada a través do Comité de Ética do grupo Inditex, destapou o patrón de conduta inadecuada e culminou coa resolución de despedimento notificada o 26 de xullo de 2024.

ALEGACIÓNS
O recorrente alegou, entre outros motivos, que a empresa non seguiu o protocolo específico de acoso do Plan de Igualdade e que os feitos prescribirían. O TSXG rexeitou todas as súas alegacións, sinalando que o procedemento seguido garantiu o dereito de defensa e que, ao tratar de condutas continuadas, o prazo de prescrición compútase desde o último feito, non transcorrendo os sesenta días previstos para as faltas moi graves.

A Sala subliña que os comportamentos descritos encaixan tanto no Estatuto dos Traballadores como no convenio colectivo aplicable, que tipifica como falta moi grave "toda conduta que atenche gravemente contra a intimidade e dignidade mediante ofensa verbal ou física de carácter sexual", agravada cando media unha posición xerárquica.

Con esta confirmación, mantense firme a sentenza do Xulgado do Social número 2 de Ferrol, que en marzo de 2025 xa desestimara a demanda do traballador e absolvía a Pull & Bear de toda reclamación. A resolución é susceptible de recurso de casación para unificación de doutrina.