Destapan en Vigo un taller ilegal con "migrantes sen contrato" e "encerrados baixo chave" nas instalacións

Unha denuncia de FESMC-#UXT de Vigo destapou unha auténtica trama na cidade olívica, tal e como constataron desde Inspección de Traballo sobre un caso que xa está en mans da fiscalía. Diso informa o sindicato, que reitera as "gravísimas irregularidades laborais" que se daban en "un taller de montaxe de eventos en Vigo". Da denuncia presentada o pasado mes de maio descóbrese que detrás deste armazón atópase a empresa de eventos fincada en Vigo Absolute Branding Company S.L., á que UXT sinala como "empresario real das persoas traballadoras afectadas". 

"ENCERRADAS NUN TALLER A PORTA PECHA"

Na nota de UXT falan de que a primavera pasada deuse parte de que no taller había "varias persoas migrantes que traballaban sen contrato" e "sen alta na Seguridade Social". O máis escandaloso é que esas persoas tiñan unhas condicións con "salarios debidos" e permanecían "encerradas nun taller a porta pecha" situado en Teis. 

Isto motivou unha visita dos inspectores e das Forzas e Corpos de Seguridade do Estado -actuación que recalcan e felicitan desde UXT-, chegando a rexistrar tamén a oficina principal da empresa, con sede en Gran Vía. Alí abriuse expediente e "#verificar a situación laboral das persoas traballadoras alí empregadas", segundo o relato de UXT.

 
"Tras varias citacións e requirimentos de documentación ás empresas implicadas, a Inspección conclúe que o empresario real é a mercantil Absolute Branding Company S.L., e acorda: abrir unha orde de servizo
especifica a devandita empresa; iniciar un expediente sancionador por ocupar a cinco persoas traballadoras sen autorización de traballo (...); e informar á Fiscalía da área de Vigo ante a posible comisión dun delito contra os dereitos das persoas traballadoras", indican na súa nota. 

REFORZOS A INSPECCIÓN

Os feitos tiveron como resultado o descubrimento dun lugar de traballo "en negro" e un caso de "posible explotación laboral" que agora pode acabar nos tribunais. "Esta resolución é unha mensaxe clara a quen pretenden facer negocio pisando os dereitos máis básicos. En pleno 2025, nunha cidade como Vigo, non imos tolerar talleres clandestinos, xornadas en negro nin traballadores de primeira e de segunda", censuran desde UXT. 

"Detrás das campás de mercadotecnia e os grandes eventos non pode haber persoas migrantes encerradas, sen papeis, sen contrato e sen cobrar", abundan, á vez que reprochan que existen empresas que cumpren a lei competindo contra outras empregan "a fraude, o medo e a miseria": "Quen levanta o seu negocio sobre a explotación de persoas vulnerables está a facer trampa a toda a clase traballadora e ás empresas que si cumpren". 

Por outra banda, o ocorrido reforza a tese, a ollos de UXT, de que resulta necesario "reforzar con medios humanos e materiais" a Inspección de Traballo, considerando que si cos medios de hoxe pódense destapar esta clase de casos, "imaxinemos o que podería facer con máis recursos". A loita contra a explotación laboral e contra o racismo no traballo pasa por ter unha Inspección forte, próxima e capaz de entrar onde outros miran para outro lado", resolven, á vez que convidan a persoas que se poidan atopar nunha situación semellante a denunciar.