O persoal de terra de Ryanair en Galicia, nun "limbo" á espera dun ERE que ninguén se atreve a anunciar

As réplicas ao sismo que provocou o anuncio de Ryanair de pechar a súa base en Santiago de Compostela seguen facendo tremer os cimentos do aeroporto compostelán, onde o persoal da aerolínea irlandesa segue vivindo con incerteza as consecuencias deste plan da firma low-cost, que no seu pulso co Goberno de España deixou de operar en Vigo e bota a persiana na súa base de Lavacolla. Para os pilotos e a tripulación queda unha saída, que é o traslado ás bases de Málaga e Alacante, onde desprazarán os avións cando comecen a pechar rutas na capital galega. Con todo, o persoal de terra ten por diante un panorama bastante menos alentador, pois agora o que sobrevoa o Rosalía de Castro é un ERE que ninguén se atreve a anunciar nunha compañía que segue sen comunicar aos seus empregados cal é a súa folla de ruta.

DE 140 VOOS A 15 Á SEMANA

A inquietude é palpable entre o persoal de terra, onde asumen que nesta tira e afrouxa entre Ryanair e Aena serán os que saian peor parados cando os voos semanais pasen de 140 a 15. "As únicas reunións que mantivo Ryanair é cos tripulantes e os pilotos para recolocalos noutras bases, como Málaga e Alacante", informan fontes do persoal, á vez que matizan que non son destinos asumibles para moitos traballadores porque xa non existen rutas que conecten estas cidades coa capital galega. 

O persoal de terra é, no entanto, fariña doutro costal: "Ninguén se puxo en contacto co persoal. Ninguén nos dixo nada. Estamos nun limbo porque só sabemos que retiraron os voos. Podemos deducir que se vai a tocar o persoal. Canto? Máis do que nos gustaría". 

As estimacións, en calquera caso, roldan unha afectación do 80% do total. Isto quere dicir que aproximadamente 80 traballadores do preto dun centenar de empregados de Ryanair en Santiago terán que facer as maletas de maneira definitiva porque "sen tantos voos non facemos falta tantos traballadores" e os poucos que quedan "distribúense dunha maneira na que non se xuntan, polo que tampouco necesitan tantas mans á vez".

"Oxalá nos propuxesen un ERTE, pero todos cremos que non será así", asumen tristemente as fontes consultadas por este diario, que tampouco teñen moita esperanza en que xurda a opción de recolocar ao persoal noutras bases, coas dificultades que isto supón para a conciliación da maioría de traballadores. O traslado no caso dos traballadores dos voos é un recurso que figura no seu contrato, algo que non se estipula no dos traballadores de terra.

OBRAS EN LAVACOLLA

O persoal está a esperar unha comunicación oficial que podería chegar a finais de semana, polo que nestes momentos "só podemos esperar" a falta de que a aerolínea bote contas. Aínda que o enfrontamento de Ryanair coas autoridades españolas vén de lonxe, e a pesar dos "rumores" que circulaban en distintos aeroportos despois dos recortes que veñen sucedendo no último ano, o persoal recibiu a noticia con sorpresa e sempre por terceiros. 

A sospeita era que poderían reducir algunhas rutas, pero non unha decisión así "nunha base que é beneficiosa para Ryanair", pois, como subliñan os afectados, "os voos van sempre cheos até os topes". "A base é produtiva. Economicamente é viable, algo que afirma o noso xefe de escala. A compañía quere manter ese enfrontamento con Aena para que rebaixen as taxas e úsanos como cabeza de turco entre os aeroportos rexionais", sosteñen fontes do persoal.

Nese sentido, pon sobre a mesa outra circunstancia relevante, pois o aeroporto compostelán estará pechado durante varias semanas en 2026 por obras, un feito que puido motivar a decisión abrupta de Ryanair. Durante cinco semanas as obras de renovación do pavimento provocarán o peche da pista entre abril e maio, ademais de efectos durante meses -de xaneiro a outubro- na quenda de noite, restrinxindo os voos nocturnos.

"Xa contabamos cun posible ERTE por esta circunstancia. Pero agora pódense aproveitar desa problemática porque non lles interesa ese parón", deducen. Por outra banda, o adeus de Ryanair, sumado a todo este proceso de renovación, supón unha estocada brutal a un aeroporto que quedará "non deserto, pero case", a pesar de que o ministro de Transportes, Óscar Puente, garantiu a chegada "inmediata" de novas aerolíneas que asumirán as rutas que quedaron libres. 

"Din que van vir novas compañías, pero non o farán até abril ou maio cando reabra a pista tras as obras. Ninguén vai vir antes para logo mandar ao persoal cinco semanas a un ERTE. Son moitos meses funcionando a medio gas coa capital de Galicia desconectada co resto de España", apuntan.

FOLGA ENTRE O PERSOAL DE TERRA?

Desde a Unión Sindical Obreira (USO) reclamaban hai días, en conversación con este diario, a mesma man dura que está a ter o Goberno co que Consumo cualificou como "abusos" sobre os clientes nos "abusos" que comete Ryanair cos seus empregados, críticas que comparten no persoal de terra: "Non é unha compañía que respecte os dereitos do traballador. Eles impoñen e naquelas bases con sindicatos podemos reivindicar os nosos dereitos, pero pasar polo aro de Ryanair...é complicado". 

De momento o colectivo levou a súa situación até os despachos dos edís non adscritos no Concello de Santiago, Mercedes Rosón, Mila Castro e Gonzalo Muíños, que tras reunir co Comité de Empresa prometen levar o caso ao pleno municipal para traballar nunha solución para os damnificados e, en calquera caso, buscar compañías para que o aeroporto sexa "máis atractivo e competitivo".

Doutra banda, e á expectativa de que as diferentes reunións que se celebren esta semana clarifiquen un pouco máis o escenario, tendo en conta que, din, "Rueda, porque non quería ou non podía, non tivo a ben de recibirnos", os traballadores xa barallan a convocatoria de mobilizacións porque é "a última baza que nos queda".