Expropiará a Xunta terreos para Altri? Rueda avoga por compras voluntarias, pero non descarta expropiar

Rueda manifesta que  "o normal e a primeira obrigación" de Altri é "chegar a acordos voluntarios". No entanto, indica que "non sería a primeira vez que houbese que recorrer a outros procedementos".

A oposición veciñal na contorna crece na zona e parece difícil pensar que todos os propietarios accedan polas boas á venda dos seus terreos.

O presidente galego en funcións, Alfonso Rueda, non descartou que a Xunta teña que iniciar expropiacións de terreos en Palas de Rei (Lugo) para situar a planta que proxecta a compañía pasteira portuguesa Altri, pero prefire que o proceso de compra sexa por "acordos voluntarios".
 

Así respondeu este xoves, ao ser preguntado directamente sobre si o seu goberno descarta empregar o procedemento de expropiación para facilitar a implantación deste proxecto industrial que está a xerar fortes críticas entre ecoloxistas, parte da poboación e partidos da oposición (#PSdeG e BNG).

Rueda respondeu que descoñece o "detalle" do procedemento de compra dos terreos, polo que avoga por "esperar" por si a Administración tivese que tomar algunha decisión.

Neste sentido, lembrou que "non sería a primeira vez que houbese que recorrer a outros procedementos", en alusión ás expropiacións, pero o presidente da Xunta cre que "o normal e a primeira obrigación" da compañía é "chegar a acordos voluntarios" cos posibles vendedores.