Competencias dixitais: AMTEGA abre o período de inscrición este 4 de maio

A Axencia para a Modernización Tecnolóxica de Galicia (Amtega) abrirá este luns, 4 de maio, o período de inscrición para que 1.259 persoas obteñan a Certificación galega en competencias dixitais (ComDix), no seu nivel de Iniciación.

Tal e como trasladou a Xunta nunha nota de prensa, as probas faranse en 46 localidades con aula CeMIT e a convocatoria está aberta a toda a cidadanía, coa finalidade de acreditar os coñecementos, habilidades e aptitudes necesarias para utilizar as tecnoloxías dixitais, tanto a nivel persoal como social e profesional.

As probas realizaranse os días 17,18 e 19 de xuño, repartidas en 98 quendas que abarcan diferentes horarios de mañá (ás 10.00 e ás 12.00 horas) e de tarde (16.30 horas).

Con respecto ás datas e lugares concretos, pódense consultar na páxina web da rede CeMIT (https://cemit.xunta.gal), así como a información sobre a tramitación e inscrición neste proceso.

Igualmente, na plataforma de teleformación da Rede CeMIT pódense atopar en liña os contidos formativos para a preparación da proba, que abarcan as cinco áreas e as 21 competencias definidas no Marco Galego de Competencias Dixitais.