Bombeiros de Ourense ao límite: "Viven da sorte, pero un día alguén se vai a quedar no lume"

O conflito laboral no Servizo contra Incendios e de Salvamento da provincia de Ourense alcanzou un punto de non retorno. Os bombeiros do consorcio provincial han convocado unha folga indefinida que comezará oficialmente este sábado. A decisión non é un feito illado, senón a culminación de anos do que os representantes sindicais cualifican como "abandono" e "desprezo" por parte da administración, especialmente da Deputación de Ourense. 

Este organismo, de natureza autónoma, xestiona a seguridade da provincia a través dun modelo onde participan a Xunta de Galicia e a Deputación de Ourense. Con todo, a falta de persoal, os recortes na antigüidade e o incumprimento dun convenio asinado a nivel autonómico crearon un clima de tensión insosteible que agora estala en forma de paro total. 

Os motivos da folga: un convenio de papel e salarios "roubados"

O detonante principal desta folga indefinida é o incumprimento do convenio colectivo. Anxo Barrio, delegado sindical da CNT en Verín, explica que o acordo foi froito dunha negociación autonómica para as catro provincias galegas, pero que a Deputación de Ourense decidiu "rebaixar" e non aplicar o asinado. 

Entre as reivindicacións máis urxentes atópase a actualización salarial. Segundo denuncian os traballadores, a administración está a "roubarlles" a antigüidade. En lugar de aplicar as subidas aprobadas polo Goberno nacional, a Deputación desconta eses importes dos trienios consolidados, o que na práctica supón unha conxelación salarial que podería durar anos. Roberto Fernández, (#CSIF), sinala unha realidade sanguenta: "Un salario base dun C2 a nivel nacional ten unhas contías e nós estamos por baixo; estamos en 720 euros fronte aos 750 que corresponden".
 

A isto súmase a falta estrutural de persoal. Os bombeiros denuncian que ven obrigados a realizar máis de 144 horas extraordinarias anuais de forma obrigatoria para cubrir os cuadrantes. O compromiso de crear 17 prazas novas en Ourense (das 102 acordadas en toda Galicia) segue paralizado, mentres que outras provincias xa iniciaron os procesos de oposición. "A administración prefire regalarnos bancos ou farois para conseguir votos antes que investir nun servizo público esencial", lamenta Barrio.

A resposta do Consorcio: silencio e "escusas" legais

A valoración que os bombeiros fan da actitude do Consorcio é de total indignación. Segundo os representantes, o presidente do Consorcio e da Deputación, Luís Menor, afirma que se está cumprindo o convenio, algo que os traballadores negan rotundamente coas nóminas na manou. "Din cousas distintas cada día, non temos claro o motivo real de por que se negan a pagar", afirma Roberto Fernández.
 

Os sindicatos puxeron o caso en mans dos seus avogados para comprobar a legalidade destas accións, cualificándoas de "dubidosas" ao tratar de normativas de rango nacional. Ademais, critican que o Consorcio non senta a negociar co Comité de Empresa. "Só veñen sacar a foto cando imos a Valencia pola DANA ou cando os incendios forestais arrasan a provincia, pero para cumprir o asinado nunca saben nada de nós", denuncian os efectivos.
 

Especialmente grave é a situación de seguridade. Os bombeiros alertan de que non existe unha avaliación de riscos laborais actualizada porque, de facerse, "diría que con tres bombeiros non se pode ir a un incendio". Actualmente, hai parques que chegaron a ter un só bombeiro de garda, o que supón un risco intolerable tanto para o traballador como para a cidadanía. "Se hai unha persoa atrapada nun lume e estou só, enfróntome ao dilema de arriscar a miña vida en solitario ou ir ao cárcere por denegación de auxilio", relata con crueza Anxo Barrio.

Que é o Consorcio e como se chegou a esta situación?

O Consorcio Provincial de Ourense Contraincendios e Salvamento é un organismo autónomo que actualmente xestiona catro parques comarcais: O Carballiño-Ribeiro, Valdeorras, Verín e Xinzo de Limia. A súa estrutura actual é froito dunha subrogación obrigatoria tras anos de xestión privada, un modelo que era unha "anomalía" en España.
 

Antigamente, o servizo era xestionado por empresas concesionarias (como Seganosa ou Infor) mediante contratos de prestación de servizos. Tras diversas denuncias e sentenzas xudiciais que obrigaron á administración a recoñecer aos traballadores como persoal fixo, o servizo pasou a ser de xestión directa.
 

Aínda que nas outras tres provincias galegas a participación económica é dun 50% entre a Xunta e a Deputación, en Ourense dáse unha situación única: debido a unha negociación histórica por unha suposta "débeda" da Xunta, a Deputación de Ourense só achega o 37,5% do orzamento, fronte ao 62,5% que asume o Goberno autonómico. A pesar de ser a que menos paga, os bombeiros sinalan á Deputación como a administración que pon todas as trabas para cumprir os acordos salariais e de persoal. Co inicio da folga este sábado, os servizos mínimos fixáronse en tres efectivos por garda. Os traballadores advirten que non darán un paso atrás: "Estamos atados, vivindo practicamente todo o ano en servizos mínimos. Isto non pode seguir así".