Repartidores galegos contra o algoritmo de Glovo

A situación dos repartidores de Glovo en Galicia pasou do conflito polos "falsos autónomos" a unha reclamación dos seus dereitos sindicais. A pesar da integración de miles de traballadores no persoal tras a Lei Rider, o sindicato Comisións Obreiras (CCOO) denuncia que a empresa instaurou un modelo laboral que tenta frear as reivindicacións laborais do persoal. Contactouse coa empresa para ter a súa versión mais até o momento da publicación desta reportaxe non houbo resposta. Na Coruña, onde o comité de empresa está composto exclusivamente por delegados de CCOO, os traballadores aseguran que o algoritmo non só asigna pedidos, senón que se converteu nunha ferramenta de castigo disciplinario contra quen alzan a voz

O castigo dixital

Os traballadores de Glovo decidiron expor ante a opinión pública o que consideran un "abuso sistemático" amparado na opacidade tecnolóxica. A resposta da empresa, segundo os representantes dos traballadores, foi o silencio ou a aplicación de sancións que CCOO tacha de "arbitrarias e inxustas". Na actualidade, os repartidores operan baixo o Convenio de Mensaxería de 2006, un texto con dúas décadas de antigüidade que carece de ultraactividad e que, segundo denuncian, a empresa utiliza de forma nesgada para aplicar un réxime disciplinario que “nin sequera está vixente”.

Esta situación prodúcese anos despois da entrada en vigor da Lei Rider, unha normativa pioneira en España que buscaba corrixir a precariedade do sector. Con esta norma obrigábase ás plataformas a contratar aos seus repartidores como asalariados. Aínda que a lei eliminou a figura do falso autónomo, os sindicatos denuncian que Glovo puxo "pedras no camiño" para obstaculizar a acción sindical, entregando censos de traballadores con erros ou tentando forzar eleccións de ámbito autonómico para diluír a forza dos comités locais.

Precariedade laboral

Segundo denuncian os traballadores os seus condicionesde distan moito do que se esperaba tras o seu laboralización coa Lei Rider. Na Coruña, o persoal abarca cinco concellos (A Coruña, Arteixo, Cambre, Oleiros e Carballo), o que implica distancias de entrega extremadamente longas que dificultan alcanzar os incentivos marcados pola empresa. Os repartidores denuncian que a xornada é imprevisible e que os horarios poden ser cambiados polos "xefes de flota" segundo o seu criterio. Ademais, durante os fins de semana, sobre todo domingos, e os días con climatoloxía adversa a carga de traballo aumenta, e tamén aumentan os riscos.

A pesar de ser asalariados, o peso da loxística segue recaendo no traballador. Os riders deben achegar a súa propia motocicleta ou bicicleta, ademais do seu teléfono móbil persoal. A cambio, a empresa ofrece compensacións que o colectivo cualifica de "irrisorias": apenas 5 euros mensuais polo uso do teléfono e ningunha cobertura real para o mantemento dos vehículos ou o combustible. "Todo o mantemento corre por conta do peto do rider", lamenta Aklaim Morais, presidente do comité de empresa da Coruña. Incluso o equipo de protección (EPI), como os impermeables para a choiva, é de baixa calidade e a miúdo non hai tallas dispoñibles para todo o persoal.

A pantasma do algoritmo

A xestión do traballo a través do algoritmo é o punto máis crítico das denuncias. Según explican os delegados sindicais, o sistema informático non ten en conta a realidade das rúas: ignora os sinais de tráfico, os semáforos ou os atascos. Cando un repartidor se demora por estas causas, o algoritmo detéctao como una ineficiencia e pode emitir un warning (aviso) ou mesmo unha sanción de soldo suspendido de até sete días.

Especialmente grave foi a situación vivida durante os últimos temporais en Galicia. En semanas de alerta vermella decretada pola AEMET, traballadores da zona de Ferrol e A Coruña foron sancionados ou despedidos por non poder cumprir cos tempos de entrega baixo ventos extremos e choivas torrenciais. "O algoritmo non entende de alertas vermellas nin de seguridade viaria", denuncian desde o comité, sinalando que tiveron que loitar xudicialmente para lograr readmisións de traballadores tras despedimentos automatizados.

Ademais, os traballadores denuncian que as súas nóminas non son transparentes e que existen descontos improcedentes que son case imposibles de reclamar individualmente. O feito de que o convenio de 2006 estea caducado agrava a situación, xa que os riders aseguran estar nun "limiar de pobreza" impropio do mercado laboral actual. Ante a falta de diálogo por parte de Glovo, CCOO xa advertiu que, se non se negocian os parámetros do algoritmo e un novo marco laboral, as mobilizacións estenderanse por toda Galicia e o resto do Estado.