Abre a convocatoria de axudas para a formación do profesorado até o 30 de setembro

O persoal docente xa pode solicitar apoio económico para participar en accións formativas realizadas tanto en Galicia como noutras comunidades autónomas ou no estranxeiro a través dunha convocatoria de axudas impulsada pola Consellería de Educación, Ciencia, Universidades e FP.

A Xunta informou de que, así, mantén o reforzo das axudas aos docentes cun investimento de 200.000 euros, ademais de ofertarlles unha ampla oferta de actividades no plan de formación que a Consellería deseña cada curso escolar. As persoas interesadas dispoñen de prazo até o 30 de setembro para presentar a súa solicitude a través da sede electrónica da Administración autonómica.

As axudas cobren actividades desenvolvidas entre o 1 de xaneiro e o 30 de novembro deste ano e están dirixidas tanto ao persoal funcionario de carreira como a docentes en prácticas, interinos e substitutos, sempre que cumpran os requisitos da convocatoria.

As accións subvencionables deben estar directamente vinculadas a áreas prioritarias, como igualdade, convivencia e inclusión, saúde e benestar, tecnoloxías e ámbito STEM (Ciencia, Tecnoloxía, Enxeñaría e Matemáticas), plurilingüismo e educación artística.

O apoio económico cubrirá até o 100% dos gastos de matrícula e desprazamento, cun importe máximo de 200 euros para actividades realizadas en Galicia, de até 325 euros no resto do territorio español e de 750 euros no estranxeiro.