Aumenta un 30% o investimento en seguridade dixital por parte das PEMES galegas no último ano

O tecido empresarial galego investiu en 2023 máis de 150 millóns de euros en ciberseguridad, o que supón un incremento de máis dun 30 % respecto á cifra do ano anterior. Pemes e micropymes destinaron 36 millóns de euros máis a protexer fronte á ciberdelincuencia.

En 2024, segundo informou a Xunta, preto dun 20 % das empresas galegas de 10 ou máis empregados rexistraron algún incidente de ciberseguridad.

A maioría (78%) son casos de falta de dispoñibilidade dos servizos TIC por fallos no software e hardware e, en menor medida (19,6 %), sitúase a perda de datos debido a ataques exteriores. Nas pequenas empresas os incidentes de ciberseguridad non chegan ao 4%.

Son datos do informe 'Galicia. A economía en dixital. A Sociedade da Información nas Empresas de Galicia', edición 2024, publicado polo Observatorio da Sociedade da Información e a Modernización de Galicia (Osimga), adscrito á Axencia para a Modernización Tecnolóxica de Galicia (Amtega).

O informe analiza tamén o uso das tecnoloxías disruptivas por parte das empresas galegas. En 2024, o 13,1% das empresas con 10 ou máis persoas traballadoras empregaron a Intelixencia artificial, superando en 3,5 puntos porcentuais a media estatal. No caso das microempresas o uso desta tecnoloxía non chega ao 6%, unha cifra moi parella ao indicador estatal.

Ademais, o informe sinala que máis do 30% das grandes empresas empregan servizos de Cloud Computing, principalmente para a xestión do correo electrónico, o almacenamento na nube, servidores de bases de datos e software de ofimática.

Nunha porcentaxe próxima, o 27%, está o uso da analítica de datos neste perfil empresarial, sobre todo aplicada a datos sobre clientes (65,8%) e rexistros de transaccións (85,3%).

TALENTO DIXITAL
O 20,5% das empresas galegas de 10 ou máis persoas empregadas contan con persoal de perfil tecnolóxico, o que sitúa a Galicia a 5 puntos por encima da media estatal (15,7%). Os expertos en datos e ciberseguridad son os que teñen maior presenza nas empresas.

O 52,5% das empresas de 10 ou máis empregados que contratan estes perfís empregan mulleres especialistas TIC. No caso das microempresas, a contratación de mulleres especialistas TIC alcanza un 44,9%, rexistrando un incremento relativo do 136,3% desde o último ano.

COMERCIO ELECTRÓNICO
No 2024, as cifras de vendas mediante comercio electrónico mantéñense en porcentaxes moi similares ás do ano anterior. O cambio máis destacable é o aumento na porcentaxe con vendas das empresas de 0 a 9 empregados, que pasa dun 11,8% a un 12,5% (+5,9%).

O 81,4% das empresas galegas de 10 ou máis persoas empregadas dispoñen de páxina web, moi preto da media estatal (81,8%). Nas microempresas galegas, a dispoñibilidade crece un 24%, pasando do 23,7% ao 31,2% nun só ano.