Así serán os bonos turísticos da Xunta en 2025

A Xunta de Galicia porá en marcha en xullo unha nova edición do bono turístico para impulsar o sector durante o outono. Esta iniciativa, que busca combater a estacionalidade e dinamizar a economía local, permitirá aos cidadáns acceder a até dous bonos de 150 euros cada un, que poderán utilizar desde mediados de setembro até Nadal. O obxectivo é mobilizar 2,5 millóns de euros e fomentar o turismo interno mediante a cofinanciación de estancias e actividades na comunidade.

O Consello da Xunta deu luz verde ao acordo que seleccionará unha entidade colaboradora para xestionar a nova edición do programa DescubreGaliciaenOutono, que distribuirá máis de 16.000 bonos en formato QR. Cada usuario poderá obter un máximo de dous bonos, cofinanciados nun 40% pola Xunta e nun 60% polos solicitantes, quen deberán abonar 90 euros por cada bono. Os establecementos de aloxamento e axencias de viaxes de Galicia poderán adherir ao programa en xullo, sempre que estean inscritos no Rexistro de Empresas e Actividades Turísticas.

Impulso ao patrimonio e a oferta turística

Durante o mesmo mes de xullo, tamén se abrirá o prazo para que o público xeral descargue os bonos a través da web oficial, seguindo un procedemento de concorrencia non competitiva. A convocatoria publicarase no Diario Oficial de Galicia, e os bonos estarán dispoñibles até esgotar existencias.

Doutra banda, o Consello da Xunta autorizou a firma dun convenio entre Turismo de Galicia e o Concello de Oza-Cesuras para a rehabilitación parcial do histórico sanatorio de Paraxón. Este edificio modernista, proxectado entre 1922 e 1924 por Antonio González Villar, nunca chegou a funcionar como centro de tratamento da tuberculose, pero agora será recuperado como albergue turístico. A intervención centrarase na planta baixa, única zona apta para o novo uso, mentres que a planta alta quedará reservada para futuras actuacións. A Xunta achegará 250.000 euros dos 518.299,28 euros orzados para o proxecto.

Novos servizos deportivos e urbanos en Ribadumia

Ademais, o Consello deu luz verde a un convenio co Concello de Ribadumia para a construción dun edificio de servizos no campo de fútbol e o pavillón polideportivo de Barrantes, así como a mellora da contorna. Este proxecto, cun custo de 1,086 millóns de euros, contará cun financiamento autonómico próxima ao 35%. Prevese a creación de novos vestiarios e a transformación do espazo público nun parque urbano que conecte os centros escolares e deportivos da zona.

Estas actuacións reflicten a aposta da Xunta por reforzar a oferta turística e patrimonial de Galicia, promovendo tanto a modernización de infraestruturas como a recuperación de espazos históricos para atraer visitantes e mellorar a calidade de vida local.