Aviturga denunciará a ordenanza sobre vivendas turísticas da Coruña

A asociación de vivendas de uso turístico de Galicia (Aviturga) vai levar ao xulgado a ordenanza aprobada esta semana polo Concello da Coruña que regula esta actividade.

Os propietarios entenden que un 80% das vivendas actuais non poderán dedicar xa ao uso turístico por mor da retroactividad da lei e que a medida non vai facer baixar os prezos do aluguer residencial.

No rexistro de Empresas e Actividades Turísticas da Xunta figuran 1.389 vivendas de uso turístico na cidade da Coruña. En ano e medio case se duplicaron, fundamentalmente na zona vella e en Pescadería. A ordenanza municipal regulará estas vivendas, tanto as que xa existen como as futuras. Limita o número por habitantes para frear a gentrificación, só permite que estean situadas en plantas baixas ou en primeiros pisos e en edificios para este uso exclusivo. Son medidas que tratan de frear a subida de prezos dos alugueres residenciais, pero os actuais propietarios cren que se vulneran os seus dereitos.

"Entendemos que o concello até o 2024 non pediu ningún título habilitante e consideramos que unha ordenanza non é a fórmula idónea, que nos aplica con carácter retroactivo unhas medidas e restricións cando xa estabamos a facer as cousas como se nos pediu. Nós entendemos que unha postura intermedia sería respectar os dereitos das vivendas que están a funcionar, establecer un réxime de saída, un prazo a futuro para que as licenzas puidesen revogar. A regulación de que sexan baixos ou primeiros non nos parece mal, a condición de que non se lesionen os intereses das persoas que o fixeron ben até agora e acolléronse a unha regulación autonómica que está vixente", asegura Rafael Serrano, vicepresidente de Aviturga.

A entrada en vigor da ordenanza está prevista para principios de xullo e os propietarios teñen até tres meses para regularizalas, pero valoran que até un 80% desaparecerán do mercado.

"No centro da cidade non vai quedar ningunha vivenda e nos barrios vai quedar moi reducida: nos baixos e primeiras plantas, poucos. En edificios completos esíxeselles a perda de habitabilidade como vivenda, así que cremos que tampouco vai haber moitos edificios que escollan esa opción", asegura Serrano.
 

Cren que con esta medida A Coruña vai perder un perfil de visitante familiar que pasaba varios días na cidade e que non vai ir a un hotel.