As razóns de Escotet para dicir non á fusión de Abanca co Sabadell

Banco Sabadell é o motor destas conversacións, alentado pola procura dunha posición máis sólida que lle permita repeler o longo asedio de BBVA. As conversacións comezarían hai semanas, segundo fontes do mercado citadas a onte por Expansión , e aspiran a blindar a independencia de Sabadell ante unha OPA hostil de adquisición.

Banco Sabadell conta cuns 240.000  millóns de euros en activos a peche de 2024, mantén 1.350 oficinas en territorio español  -cunhas 60 en Galicia pois en 2013 absorbeu ao Banco Galego- e emprega a uns 19.000 traballadores. O seu cociente de capital CET1 fully loaded situouse nun 13,31 % no primeiro trimestre de 2025. Ocupa a cuarta posición no ranking de entidades españolas por volume de activos. 

Abanca, dominadora do mercado en Galicia dado que é froito da fusión das antigas caixas, presenta unhas magnitudes que a sitúan no sétimo posto do ranking español. A 31 de decembro de 2024 acumulaba uns 84.000 millóns de euros en activos, procedentes de 882 oficinas nas que traballaban 7.589 empregados. A súa solvencia é das mellores do mercado español, o CET1 fully loaded alcanzaba un 13,00 %.

A andaluza Unicaja, con sede en Málaga, ocupa o sexto lugar no escalafón da banca española. Ao peche de 2024 rexistraba uns 98.000 millóns de euros en activos, contaba con 952 oficinas distribuídas polo territorio e empregaba a unhas 7.500 persoas. O seu cociente CET1 fully loaded situouse nun 15,1 %, un colchón superior á media do sector.

O escenario legal e de mercado

No ranking por activos, só CaixaBank (590.000 M €), Santander (507.000 M €) e BBVA (418.000 M €) superan a un hipotético conglomerado que podería colocar á nova entidade na cuarta posición nacional.

A entidade resultante de sumar os activos de Sabadell, Abanca e Unicaja superaría os 420.000 millóns de euros en balance, xestionaría máis de 3.100 oficinas e empregaría ao redor de 34.000 traballadores.

A lei española impide executar unha OPA sobre entidades que non cotizan en bolsa. O Sabadell e Unicaja si cotizan pero Abanca non. É dicir, o Sabadell non está en condicións de forzar a galegos mediante unha OPA. A única opción é unha fusión polas boas. Tal posibilidade parece, a priori, difícil, por cuestións económicas pero tamén políticas. 

O mesmo luns que saltaba a filtración Abanca e Unicaja desmentían calquera interese nunha operación corporativa conxunta con Sabadell.   O banco galego asegura que «non ten interese en operacións corporativas» e centra os seus esforzos no seu plan estratéxico 2025-2027.

Unicaja, pola súa banda, recalca que o seu foco está na transformación dixital e o crecemento sostible, sen distraccións. É dicir, os dous deron a resposta de libro de calquera banqueiro nesta tesitura.

Estas negativas restan credibilidade ao rumor. Os analistas sinalan que Sabadell podería estar a presionar para gañar tempo fronte a BBVA. «É unha estratexia clásica: crear incerteza para que o oferente revise os seus termos ou retire a oferta», apunta un experto sectorial.

Escotet e o PP perderían moito poder 

Cales son os plans estratéxicos de Juan Carlos Escotet, do dono de Abanca? Ao hispano-venezolano a priori interésalle máis ser "cabeza de rato que cola de león". 

O banqueiro prefire preservar o control dunha entidade rexional, pero cunha presenza cada vez maior no mercado español grazas á compra de entidades máis pequenas na última década, antes que integrar nun xigante bancario español, onde o seu peso se diluiría. 

Hai que ter en conta que a Escotet -dono do 84,75% de Abanca e do grupo panameño Banesco- foille moi ben en España en solitario. En poucos anos converteuse na terceira fortuna do Estado segundo Forbes, grazas a que, entre outros factores, Abanca mantén en moitas partes de Galicia un mercado case cativo. 

Unha posición que lle confire un enorme poder político e económico na autonomía. É dicir, moita estabilidade fronte á incerteza que lle suporía ser un actor secundario nunha entidade estatal, sometida aos vaivéns da máis cambiante política española.

Ademais, a nova entidade debería cotizar en bolsa e Escotet mostrouse receosa até agora a lanzar parte dos seus títulos no parqué. O venezolano é un banqueiro de raza e é difícil que renuncie ao seu feudo a cambio de ser vasallo dun reino maior. 

Hoxe mesmo, Escotet reafirmouse no seu non, argumentando que desexa que Abanca manteña o seu "gobernanza e modelo de negocio". O banqueiro mostrouse confiado en seguir escalando posicións no ranking de bancos estatais, onde é sétimo, até o quinto posto en cuestión de cinco anos, o que apunta a que segue interesado en ir comprando entidades máis pequenas, non en fusionar con outras maiores. 

En clave política,  ver Abanca diluír non sería prato de bo gusto para a elite política e económica de Galicia. Os empresarios e os polítiocs galegos non ven con bos ollos que o temón do banco herdeiro das caixas de aforros do país pase a un consello de dirección onde apenas terían influencia. Especialmente se o poder bascula cara a unha autonomía, Cataluña, onde o PP é historicamente débil. 

Dado o poder do PP galego dentro do PP estatal, é moi dubidoso que o principal partido de España aposte por esta fusión. Iso si, por agora nin Alberto Nuñez Feijóo nin Alfonso Rueda pronunciáronse. 

Con estas cartas sobre a mesa, non é de estrañar que a filtración dunha posible fusión chegase acompañada dunha indicación de que o Goberno Central, as mans do PSOE, estaría a favor do nacemento de Sabadell+Unicaja+Abanca.

O poder comunitario tamén estaría a favor da fusión. O Banco Central Europeo vería con bos ollos unha operación que fortaleza a solvencia do sector, unindo a dúas entidades con bos ratings de solvencia (Abanca e Unicaja) con outra maior cuns ratings menos lustrosos. A operación requiriría o placet do BCE, pero en principio por ese flanco non debería haber problema. A maior dificultade é Escotet, que non quere ser o cabalo branco que salve ao Sabadelle das garras do BBVA.