O DOG publica o decreto para o pago do complemento para 36.500 galegos con pensión non contributiva

O Diario Oficial de Galicia (#DOG) publica este martes o decreto que establece o pago dunha axuda ás persoas que perciben unha prestación non contributiva.

A Xunta destina 8 millóns de euros a ingresar de oficio un complemento extra de 218 euros ao redor de 36.500 persoas beneficiarias de pensións de xubilación e invalidez nas súas modalidades non contributivas e as do subsidio de garantía de ingresos mínimos.

Este é un único pago anual que os beneficiarios reciben de maneira automática nas súas contas bancarias, sen necesidade de que o soliciten nin que fagan trámite algún. Deberán cumprir dous requisitos: ter residencia habitual en Galicia e estar en situación de alta en nómina a data de 1 de xaneiro de 2025.

Galicia é unha das poucas comunidades que concede, de maneira ininterrompida desde o ano 2008, esta axuda extraordinaria que non é obrigatoria, pois son os propios gobernos autonómicos os que deciden mantela.

Ademais, mantense o adianto do pago, tal e como se fai desde 2023, xa que anteriormente estas axudas ingresábanse a finais de cada ano. A Xunta xa anticipara que o pago se realizaría este mes.