Os beneficios de Escotet en Abanca cuadriplican o que gastou en comprar as caixas

A marca de beneficios anuais que Abanca presentou esta semana implica que a entidade acumula máis de 5.000 millóns de beneficios desde que naceu das previamente rescatadas cinzas das caixas de aforro de Galicia. 

Juan Carlos Escotet pagou á entidade pública FROB 1.007 millóns polas accións de Novacaixagalicia Banco, a entidade resultante da fusión de Caixa Galicia e Caixa Nova.. Por tanto, pódese estimar que na década que pasou desde a polémica operación, o magnate hispano-venezolano gañou uns 4.000 millóns, antes de impostos.

GANA NUN ANO MÁIS DO QUE PAGOU

A gráfica do resultado do exercicio anual de Abanca non deixa lugar a dúbidas. Como para case todas as entidades bancarias españolas, 2024 foi un ano histórico, supernado a cifra de 1.200 millóns como resultado do exercicio. É dicir, co que gañou nun ano xa lle chegaría para compensar gastar na adquisición da entidade que no seu día fose rescatada con diñeiro público. É un 59% máis que o ano anterior.

Hai que lembrar que o diñeiro inxectado nas caixas e NCGbanco para evitar a súa quebra durante o estalido da burbulla inmobiliaria superou os 12.000 millóns de euros de rescate en diferentes conceptos, segundo o informe definitivo de Banco de España sobre aqueles convulsos anos.

Tal nivel de beneficios suscitou as críticas do alcalde de Ourense. González Pérez Jácome culpa a Alberto Nuñez Feijóo.

En todo caso, é evidente que o considerable risco que asumiu o magnate ao presentar a oferta máis alta na poxa do FROB nun momento no que había moitas dúbidas sobre o futuro da economía e da banca de España saíulle a conta. De feito, ésto permitiulle situar entre as persoas máis ricas de España. 

Segundo a última lista FORBES, é o sexto máis rico do Estado, cunha fortuna persoal duns 4.000 millóns de euros. É dicir, aproximadamente, Escotet ten un patrimonio que equivale a un terzo do orzamento anual da Xunta de Galicia e máis que o que dispoñen as conselleerías de Educación e Cultura xuntas.
 

Só polos 1.000 beneficios do ano, ingresará en dividendos case 160 millóns de euros. Escotet posúe directamente o 43% do banco e outro 41% é propiedade das empresas familiares que el controla.

Escotet apostou por comprar nun bo momento e agora recolle réditos

A repentina subida dos beneficios de Abanca nos últimos anos explícase en boa medida pola arriscada e agresiva política de expansión que executou Escotet até fai uns poucos anos.

Durante a resaca do ladrillo, o crédito contraeuse e a banca viu como as súas marxes de beneficios reducíanse moito. Os bancos -tamén Abanca- responderon con ERES e pechando oficinas. 

Cos beneficios dos primeiros anos e no canto de investir no tecido produtivo de Galicia como antes era a obrigación das caixas, Abanca aproveitou as conyentura para comprar unha serie de pequenas e adelgazadas entidades financeiras doutras partes de España e Portugal:

• 2017: Adquisición de Popular Servizos Financeiros, a división de crédito ao consumo de Banco Pastor. 
• 2018: Compra de Deutsche Bank PCB e de Banco Caixa Geral, este último por 384 millóns de euros, o que permitiu a ABANCA ampliar a súa presenza no mercado español. 
• 2020: Adquisición de Bankoa, sumando 30 novas oficinas e máis de 40.000 clientes, fortalecendo a súa posición no País Vasco e Navarra.   
• 2021: Compra do negocio en España de Novo Banco, incrementando o seu volume de negocio e consolidando a súa presenza no sector bancario español. 
• 2023: Adquisición da rede de Targobank en España, o que supuxo un aumento do 5,2% no seu volume de negocio e unha maior presenza na península ibérica. 

Coa progresiva mellora do ciclo económico, a rendibilidade do sector bancario disparouse. Abanca non é a única entidade financeira española con números nunca vistos. 

Os record alcanzáronse a pesar da baixada dos tipos de interese e o custo do imposto extraordinario imposto polo Goberno. De media no sector os beneficios aumentarían en torno ao 20% respecto ao ano anterior, impulsados a reactivación da actividade crediticia, especialmente no sector hipotecario. 

Entre os bancos que presentaron cifras marca atópanse:

1. Banco Santander: Obtivo un beneficio histórico de 9.309 millóns de euros, un 14% máis que o ano anterior.
2. #BBVA: Rexistrou ganancias de 7.622 millóns de euros, un 28% máis, alcanzando unha cifra sen precedentes.
3. CaixaBank: Logrou un beneficio de 4.248 millóns de euros, un 16% máis que o ano previo.
4. Banco Sabadell: Alcanzou un beneficio marca de 1.295 millóns de euros, un 26% máis.
5. Bankinter: Conseguiu un beneficio inédito de 731 millóns de euros, case un 7% máis que o ano anterior.
6. Unicaja: Obtivo 451 millóns de euros, un 58% máis, mostrando con ABANCA a mellor evolución de resultados en todo o sector.

PROTESTAS POLAS CONDICIÓNS DO PERSOAL

Esta mellora no negocio dos banqueiros non está a ser acompañada por unha recuperación do número de oficinas nin dos dereitos laborais dos seus traballadores, ou polo menos non na mesma medida. 

Por exemplo, esta semana os sindicatos CIG e ASCA han dennciado que a marca galega do dono de Banesco somete aos asalariados a una presión desmesurada para que coloquen produtos á clientela, abusa dos contratos en prácticas e non facilita a conciliación, aproveitando que -segundo ASCA- “ non aplica os horarios de convenio”. Os empregados reclaman que Abanca aproveite as cifras rércord para mellorar as condicións dos seus asalariados e, así, mellorar tamén a calidade coa que atenden á clientela, moita dela envellecida.