Víctor Muñoz, Facua Galicia: "a rebaixa do IVE na factura da luz obedece á subida dos prezos da enerxía"

-Como pode influír a baixada do IVE na factura da luz nas economías familiares?

As factuas do mes de xullo aínda levarán o IVE sen reducir. O importe deste imposto pasará do 21% ao 10%, por tanto a diferenza vai ser de once puntos. A subida ao 21% estaba prevista no caso de que o prezo da luz situásese en niveis moi baixos. E con todo, agora que os prezos subiron toca baixar o IVE.

-As grandes empresas aceptan de boa gana estas subidas e baixadas?

O IVE non deixa de ser un imposto, co cal se recada para entregalo ao estado. Onde pode estar o problema? Posiblemente na xestión, como cando entrou o novo sistema de facturación eléctrica, que foi un caos. É máis, hoxe en día hai persoas que non reciben as facturas de forma regular, isto quere dicir que non foron quen para adaptar ao novo sistema tarifario. 

-Como poden as familias facer cálculos de previsión sobre o IVE e a factura da luz?

Hai que velo en perspectiva. Desde FACUA dicimos que aquí o mercado eléctrico era intocable, “Europa non deixa facer nada” era o mantra que se repetía. Con todo, desde uns anos a esta parte púidose ver que non é así. Materializouse na Excepción Ibérica, despois falouse doutros puntos como a rebaixa do IVE, o cal se fixo, e ao final o prezo da luz deixou de ser un problema tal como fora. Isto lévanos a que a solución é a reforma do mercado eléctrico, porque dentro do mercado temos unha serie de factores que non permiten facer previsións. A aspiración é ter uns prezos baratos, alcanzables na enerxía eléctrica. Para isto, unha das propostas de FACUA é excluír a electricidade xerada por centrais nucleares da factura porque o que consegue é incrementar os prezos, por iso insistimos nunha reforma do mercado eléctrico. 
 

-Desde FACUA cales son as propostas para esa reforma do mercado enerxético?

Unha é a xa indicada, retirar determinadas fontes xeradoras da poxa eléctrica que fan subir artificialmente os prezos. Outra cuestión son as centrais hidroeléctricas cuxas concesións van caducando e transformalas nunha empresa pública. Xusto en Francia existe unha empresa así, a máis grande do mercado. Por iso digo que en canto á caducidade das concesións, unha vez acabados os períodos de concesión pasalas a unha empresa pública que poida fixar os prezos e así actuar como salvavidas fronte a situacións como as vividas nestes anos pasados e desta maneira, as familias puidesen ver rebaixados os prezos.

-Iniciativas como a instalación de placas solares na nosa casa, en comunidades de montes, etc., ao final resultan máis caras ou máis baratas que o consumo xeneralista?

Depende de onde vivas, como é o lugar onde vas instalar as placas, para que vas utilizar a enerxía xerada por esas placas, si para autoconsumo, para unila á rede ou para autoconsumo e os remanentes metelos na rede, ao final é unha cuestión de números. Hai empresas que se dedican ha facer ese tipo de cálculos e así ti podes facer contas para saber cando amortizarás o investimento. Se non me resulta positivo, non vale a pena facelo.
 

-A factura da luz en Galicia tería que ser máis barata?

É máis ben unha cuestión política. Estou a favor dunha certa solidariedade en todos os territorios. En Galicia vemos como se quere xerar enerxía verde, algo que está moi ben, pero non vexo cal será o retorno que nos dea a instalación de proxectos de enerxía verde.