Empeza o preito de Escotet (Abanca) contra Panamá no Banco Mundial

O Centro Internacional de Arranxo de Diferenzas relativas a Investimentos (CIADI), un ente pertencente ao Banco Mundial,  acaba de constituír o tribunal que debe xulgar a denuncia presentada por Banesco Holding Latinoamérica contra o Ministerio de Economía e Finanzas da República de Panamá.

Banesco Holding Latinoamérica é un instrumento financeiro rexistrado en España polo dono de Banesco e Abanca, o hispano - venezolano  Juan Carlos Escotet. 

Sobre que versa a demanda? A matriz de Abanca argumenta que outras entidades de Panamá executaron avais sobre obras públicas a pesar de que os contratos avalados foran dados de baixa polas correspondentes aseguradoras.  En xogo están 10,4 millóns de euros.

Con todo, o máis relevante non é a cantidade de diñeiro en disputa, dado o volume do patrimonio de Escotet, que é xa o cuarto home máis rico de España, segundo Forbes, cunha fortuna de máis de 3.000 millóns. O máis destacable informativamente é que o banqueiro venezolano invoca  na súa demanda un tratado internacional de protección de investimentos asinado entre Panamá e España. 

É dicir, Escotet fai uso do marco legal español para demandar a Panamá. O país centroamericano -onde se refuxiou gran parte do capital venezolano tras o chavismo- era a súa principal fonte de negocios ata que comprou Abanca. Paulatinamente, o magnate foi trasladando parte da estrutura legal da súa fortuna a España, en busca dunha maior seguridade xurídica.

O empresario contratou á rama española do  bufete de avogados internacional Clifford Chance, un dos máis importantes do mundo, para levar o preito. É o mesmo despacho que lle asesorou, por certo, na adquisición de Novagaliciabanco (hoxe Abanca) e na posterior compra doutras entidades españolas.

O CIADI acaba de nomear aos membros do tribunal, tres expertos, presididos polo suízo - peruano Franz X. Stirnimann Fontes. A primeira sesión tivo lugar a mediados de abril e a finais de mes o tribunal emitiu unha orde sobre a confidencialidade do preito, que se presentou en setembro de 2023.