O Goberno prorroga as solicitudes de axudas para a PAC até o 15 de xuño
O ministro Luís Planas anuncia a decisión "como solicitaran as organizacións agrarias".
O ministro de Agricultura, Pesca e Alimentación, Luís Planas, anunciou este luns en Bruxelas que o prazo de presentación da solicitude única das axudas directas da Política Agraria Común (#PAC) para 2024 prorrogarase até o próximo 15 de xuño.
Esta nova prórroga chega tras unha extensión previa que ampliou o prazo até o 31 de maio, aínda que o sector agrícola reclamou aínda máis tempo debido aos atrasos acumulados na tramitación de expedientes.
"Esténdese, como solicitaran as organizacións agrarias, con carácter extraordinario e tendo en conta que moitas das medidas adoptadas teñen efecto retroactivo a 1 de xaneiro de 2024 e por tanto aplícanse xa este ano", explicou o ministro en declaracións aos medios á súa chegada ao Consello de Agricultura que se celebra na capital belga.
Planas precisou que "hoxe empeza a consulta pública sobre esta nova medida" que, "en termos prácticos", implica que se eliminarán as penalizacións polo atraso na presentación das declaracións da PAC correspondentes a 2024 até o 15 de xuño.
Deste xeito, o Goberno busca facilitar así que os solicitantes das axudas poidan acoller ás flexibilidades e simplificación da PAC no contexto das novidades lexislativas.
Agricultura xa indicou, en relación á anterior prórroga, que a incerteza ante esta situación de cambios normativos provocou que o avance da captura de solicitudes sexa máis lento do normal, polo que considera que é necesario ampliar os prazos de presentación da solicitude única, de modo que se garanta que todos os agricultores e gandeiros poidan presentar este ano a súa solicitude da PAC.
Espérase que ao redor de 625.000 agricultores e gandeiros presenten a súa solicitude única da PAC para recibir os pagos correspondentes a partir do próximo 16 de outubro. O importe total das axudas directas para a actual campaña ascende a 4.882 millóns de euros.
Escribe o teu comentario